آئینی ترامیم: سینیٹ اور قومی اسمبلی میں مجوزہ پیکیج آج پیش کئے جانے کا امکان

اسلام آباد : سینیٹ اور قومی اسمبلی کے اہم اجلاس آج طلب کر لیے گئے ہیں۔ دونوں ایوانوں میں آئینی ترامیم کا مجوزہ پیکیج آج پیش کیے جانے کا امکان ہے۔دوسری جانب پاکستان تحریک انصاف نے مخالفت کا اعلان کر رکھا ہے۔ ذرائع کے مطابق اجلاس کے لیے 6 نکاتی ایجنڈا بھی جاری کر دیا گیا ہے۔

قومی اسمبلی کا اجلاس آج دن ساڑھے گیارہ بجے اور سینیٹ کا اجلاس آج شام چار بجے طلب کیا گیا ہے۔ وزیراعظم شہباز شریف نے قومی اسمبلی اجلاس سے پہلے کابینہ کا اجلاس بھی آج ہی طلب کر رکھا ہے، اجلاس میں آئینی ترمیم کے مسودے کی منظوری دی جائے گی۔

ذرائع کے مطابق عدلیہ سے متعلق آئینی ترمیم میں سپریم کورٹ کے ججوں کی مدتِ ملازمت 65 سال سے بڑھا کر 68 سال کرنے اور ہائی کورٹس کے ججوں کی مدتِ ملازمت 62 سال سے بڑھا کر 65 سال کرنے کی تجویز شامل ہے۔ اس کے علاوہ جج تقرری کے طریقہ کار میں بھی تبدیلی کا امکان ہے۔

ممکنہ قانون سازی کے مسودے میں جوڈیشل کمیشن اور پارلیمانی کمیٹی کو ایک بنانے کی تجویز آئینی ترمیم کا حصہ ہوگی۔