پاکپتن: زمین کے تنازع پر فائرنگ، بیٹا جاں بحق، ماں زخمی

پاکپتن : پاکپتن کے نواحی علاقے میں زمین کے تنازع پر دو گروپوں میں فائرنگ کا واقعہ پیش آیا ہے جس کے نتیجے میں ایک 25 سالہ نوجوان علی بہادر جاں بحق ہو گیا جبکہ اس کی ماں مینہ بی بی شدید زخمی ہو گئی۔

واقعے کی تفصیلات کے مطابق دونوں گروپوں کے درمیان زمین کے تنازع پر دیرینہ کشمکش چل رہی تھی۔ اس تنازع نے آج پرتشدد شکل اختیار کر لی جب دونوں گروپوں کے درمیان فائرنگ کا تبادلہ ہو گیا۔ فائرنگ کے نتیجے میں علی بہادر جاں جاں بحق ہو گئے اور ان کی ماں مینہ بی بی شدید زخمی ہو گئیں۔ زخمی کو فوری طور پر قریبی ہسپتال منتقل کر دیا گیا ہے۔

مقتول کے ورثا نے ڈسٹرکٹ ہسپتال میں احتجاج کرتے ہوئے الزام عائد کیا ہے کہ شام سے ہسپتال آئے ہوئے ہیں، کئی گھنٹے گزرنے کے باوجود مقتول کے پوسٹ مارٹم میں تاخیر کی جا رہی ہے اور ملزمان کی گرفتاری عمل میں نہیں لائی جا رہی۔

واقعے کی اطلاع ملتے ہی پولیس موقع پر پہنچ گئی اور تحقیقات شروع کر دیں۔ پولیس کا کہنا ہے کہ اس واقعے میں ملوث افراد کو جلد از جلد گرفتار کر لیا جائے گا اور قانون کے مطابق کارروائی عمل میں لائی جائے گی۔