طارق ملک کی بطور چیئرمین نادرا تعیناتی کا نوٹیفکیشن جاری

تفصیلات کے مطابق طارق ملک کی تعیناتی کا نوٹیفیکیشن وزارت داخلہ نے جاری کیا۔ طارق ملک کو 3سال کیلئےچیئرمین نیشنل ڈیٹا بیس اینڈ رجسٹریشن اتھارٹی (نادرا ) مقرر کیا گیا ہے۔ وزارت داخلہ نے نادرا آرڈیننس2000 کے تحت طارق ملک کی تعیناتی کانوٹیفکیشن جاری کیا۔

واضح رہے کہ وفاقی حکومت کی جانب سے طارق ملک کو دوبارہ نادرا کا چیئرمین تعینات کیا گیا تھا۔ طارق ملک پاکستان پیپلز پارٹی ( پی پی پی ) کے دور میں بھی نادرا کے چیئرمین تعینات رہ چکے ہیں۔

طارق ملک نے اپنی دوبارہ تعیناتی کے حوالے سے 9 جون کو اپنے سوشل میڈیا اکاؤنٹ ٹویٹر پر وزیراعظم عمران خان کا شکریہ ادا کیا تھا۔

یاد رہے کہ طارق ملک 2013 کے عام انتخابات کے وقت ادارے نیشنل ڈیٹا بیس اینڈ رجسٹریشن اتھارٹی (نادرا ) کے چیئرمین تھے ۔ انتخابات کے بعد جب دھاندلی کا شوراٹھا اور نادرا کی خدمات لینے کی بات کی گئی تو حکومت اور نادرا کے چیئرمین کے مابین معاملات خراب ہوتے چلےگئے جس کے بعد طارق ملک کو استعفیٰ دینا پڑا ۔