ایس سی او کونسل آف ہیڈز آف اسٹیٹ کے اجلاس کی تفصیلات جاری

اسلام آباد: دفتر خارجہ نے ایس سی او کونسل آف ہیڈز آف اسٹیٹ کے اجلاس کی تفصیلات جاری کردیں۔

اسلام آباد میں ایس سی او سربراہان حکومت کا 23 ویں اجلاس کے سلسلے میں دفتر خارجہ نے ایس سی او کونسل آف ہیڈز آف اسٹیٹ کے اجلاس کی تفصیلات جاری کردی ہیں۔

ایس سی او اجلاس میں شرکت کے لیے غیر ملکی وفود کل اسلام آباد پہنچیں گے، وزیراعظم شہباز شریف کی جانب سے کل اسلام آباد پہنچنے والے وفود کے اعزاز میں عشائیہ دیا جائے گا۔

جناح کنونشن سینٹر آمد پر وزیراعظم شہباز شریف مہمانوں کا خیر مقدم کریں گے جب کہ مہمانوں کی آمد، استقبال اور گروپ فوٹوز کے بعد کانفرنس کا باقاعدہ آغاز ہوگا۔

ایس سی او سمٹ کا باقاعدہ آغاز 16 اکتوبر کو جناح کنونشن سینٹر میں ہوگا، 16 اکتوبر کو تمام غیر ملکی سربراہان اور وفود جناح کنونشن سینٹر پہنچیں گے۔

وزیراعظم شہباز شریف ایس سی او کانفرنس سے افتتاحی خطاب کریں گے، وزیراعظم کے بعد غیر ملکی وفود کے سربراہان کانفرنس سے خطاب کریں گے۔

غیر ملکی لیڈرز کے خطاب کے بعد دستاویزات پر دستخط کیے جائیں گے،  وزیراعظم شہباز شریف کے اختتامی کلمات سے کانفرنس کے ایجنڈا آئٹمز مکمل ہوں گے۔

واضح رہے کہ نائب وزیراعظم اسحاق ڈار اور ایس سی او کے سیکرٹری جنرل کانفرنس کے اختتام پر میڈیا سے گفتگو کریں گے۔