توہین عدالت کیس:اسلام آباد ہائیکورٹ کا عمران خان کو آج عدالت پیش کرنے کا حکم

اسلام آباد ہائیکورٹ کے جسٹس سردار اعجاز اسحاق نے بانی پی ٹی آئی سے جیل میں  ملاقات نہ کرانے پر توہین عدالت کیس کی سماعت کی۔  درخواست گزار کی جانب سے فیصل چوہدری عدالت میں پیش ہوئے۔ جبکہ اس موقع پر ایڈیشنل اٹارنی جنرل منور اقبال دوگل بھی عدالت میں پیش ہوئے۔

عدالت نے سپرنٹنڈنٹ اڈیالہ جیل کو حکم دیتے ہوئے کہا کہ اگر آپ بانی پی ٹی آئی کو عدالت نہیں لائیں گے تو وجہ بتائیں گے، جس سکیورٹی تھریٹ کی وجہ سے نہیں لائیں گے اس سے متعلق عدالت کو مطمئن کریں گے۔

جسٹس سرداراعجاز اسحاق خان  نے کہا کہ درخواست گزار کے مطابق ایک نوٹیفکیشن کے ذریعے عدالتی حکم کی خلاف ورزی ہوئی، میں یہ نہیں کہہ رہا نوٹیفکیشن درست ہے یا نہیں اس کے لیے تو ان کو الگ سے پٹیشن دائر کرنا پڑے گی لیکن عدالتی حکم کے باوجود ملاقات سے انکار عدالتی حکم کی خلاف ورزی ہے، اس پر اسٹیٹ کونسل نے کہا عدالت کی سماعتیں نہیں ہو رہی تھیں اس لیے ان کی ملاقات نہیں کرائی گئی۔

اسٹیٹ کونسل نے مزید کہا کہ پنجاب حکومت  نے لا اینڈ آرڈر کی صورتحال کے پیش نظر ملاقاتوں پر پابندی لگائی ہے، جس پر  جسٹس اعجاز اسحاق نے استفسار کیا کہ  کیا وکلا کی ملاقاتوں پر بھی پابندی لگا دی گئی؟ جس نے یہ نوٹیفکیشن ایشو کیا اس نے بھی توہینِ عدالت کی ہے، حکومتِ پنجاب نے اگر وکلاء کی ملاقات روکی ہے تویہ  توہینِ عدالت ہے۔

بعد ازاں عدالت نے عمران خان کو آج سہہ پہر 3 بجے عدالت میں پیش کرنے کا حکم جاری کرتے ہوئے کہا کہ بانی پی ٹی آئی کو لے کر آئیں وہ اپنے وکلا کے ساتھ میٹنگ کر لیں گے۔