وفاقی کابینہ کا اجلاس آج، پی ڈی ایم تحریک کی صورتحال پر غور

تفصیلات کے مطابق  وزیراعظم عمران خان کی زیرصدارت  ہونے والے اجلاس کا 9 نکاتی ایجنڈا جاری کردیا گیا ہے  ۔ اجلاس میں ملک کی سیاسی،اقتصادی اور معاشی صورتحال پر غور ہوگا جبکہ وفاقی کابینہ اجلاس میں کورونا وائرس کی صورتحال پر بھی  بریفنگ دی جائے گی۔ اجلاس میں  نئے چیئرمین اوگرا کی سمری منظوری کیلئے  پیش ہوگی۔  ملک میں 30 نئی احتساب عدالتیں بنانے کی سمری بھی کابینہ میں  پیش کی جائے گی۔ سی پیک پر کابینہ کمیٹی کے 2 فروری کے فیصلوں کی توثیق ایجنڈا میں شامل ہے۔

اجلاس میں وزارت قانون سپریم کورٹ کے حکم پر نئی احتساب عدالتوں کی سمری پیش کرے گی جبکہ آئی ٹی اور ٹیلی کام سے متعلق ٹاسک فورس کے چیرمین کابینہ کو بریفنگ دینگے۔ پبلک سیکٹر اداروں کے سربراہوں اور سی ای اوز کی خالی پوسٹوں پر بریفنگ  بھی ایجنڈے میں شامل ہے ۔ میٹرو بس پراجیکٹ پر وزارت مواصلات کابینہ کو بریفنگ دے گی ۔ اسلام آباد میٹرو پولیٹن کارپوریشن کے ایڈمنسٹریٹر کی تقرری  اور  نان ٹریٹی ممالک کی جانب سے باہمی قانونی امداد کی درخواستوں کا معاملہ پیش ہوگا۔ کابینہ ای سی سی کے فیصلوں کی توثیق بھی اجلاس کے  ایجنڈا میں شامل ہے ۔