چیمپئنز ٹرافی پر ڈیڈ لاک ووٹنگ کے مرحلے سے پہلے ختم ہونے کا امکان  

آئی سی سی چیمپئنز ٹرافی کے انعقاد کے معاملے پر موجود ڈیڈ لاک ووٹنگ کے مرحلے سے پہلے ختم ہونے کا امکان ہے۔

ذرائع کے مطابق پاکستان کرکٹ بورڈ  نے آئی سی سی کے ساتھ نیا فارمولہ شیئر کیا ہے، جس  کے مطابق  بھارت میں ہونے والے آئی سی سی ایونٹس میں پاکستان بھی اپنے میچز نیوٹرل وینیوز پر کھیلے گا،

پاکستان یہ نیا فارمولا اگلے تین برس کے دوران ہونے والے  آئی سی سی ایونٹس پر لاگو کرنا چاہتا۔

اس  فارمولے کے تحت بھارت کے میچز دبئی میں ہوں گے، پاکستان برابری کی بنیاد پر بھارت کے ساتھ چلنا چاہتا ہے۔

گزشتہ روز دبئی میں میڈیا سے گفتگو کرتے ہوئے چیئرمین پی سی بی محسن نقوی کا کہنا تھا کہ چیمپئنز ٹرافی کے معاملات چل رہے ہیں کوشش کریں گے کہ جو پاکستان کے لئے بہترین ہو وہ حاصل کیا جائے۔

ان کا مزید کہنا تھا کہ میرا وعدہ ہے اب جو بھی ہو گا برابری کی بنیاد پر ہوگا، اب جو بھی فارمولا بنے گا وہ مستقبل کے لیے مثال بنے گا، اب بات صرف چیمپئنز ٹرافی تک محدود نہیں۔