ایف بی آر کا اختیار نیب کو دینا عمران صاحب کی غنڈہ گردی ہے ، مریم اورنگزیب

ترجمان مسلم لیگ ن مریم اورنگزیب  نے   سرکاری خزانے سے ہر تنخواہ لینے والے کے اثاثے سامنے لانے کا مطالبہ کردیا۔مریم  اورنگزیب نے کہا ہے کہ ایف بی آر کا اختیار نیب کو دینا عمران صاحب کی غنڈہ گردی ہے ، غنڈہ گردی اور نیب گردی کر کے ٹیکس ریوینیو میں اضافہ نہیں ہوتا ،نیب نیازی گٹھ جوڑ کی ناکامی کے بعد یہ نیا ہتھکنڈا ختیار کیاگیا ۔

مریم اورنگزیب نے کہا کہ  عوامی عہدیداروں کے اثاثہ جات تو پہلے ہی ظاہر ہوتے ہیں ،  ایف بی آر کے پاس تمام ریکارڈ اور تفصیلات موجود ہیں، ایف بی آر سے یہ اختیار نیب کو دینے کے پیچھے کیا ایجنڈا ہے؟،انکم ٹیکس قانون میں ترمیم کرکے سرکاری خزانے سے تنخواہ لینے والے ہر فرد کے اثاثے ظاہر کئے جائیں ۔

ان کا مزید کہنا تھا کہ تین سال میں نیب نیازی گٹھ جوڑکی غنڈہ گردی نے ملک اور معیشت کو تباہ کیا، ایف بی آر افسران کا ٹیکس دہندگان کو گرفتارکرنے کا اختیار مکمل ختم کیاجائے ۔یہ اقدامات عمران صاحب کے فسطائی اور بیمار ذہن کی عکاسی ہے۔