کشمور:پولیس نے کچے کے ڈاکوؤں کوسپلائی ہونے والی اسلحے کی کھیپ پکڑلی

کشمور پولیس نے انٹیلی جنس بیسڈ کارروائی کرتے ہوئے اسلحے کی بڑی کھیپ پکڑلی جبکہ 7 ملزمان کو گرفتار بھی کرلیا۔

کشمور پولیس نے تھانہ اے سیکشن کی حدود میں کچے کی طرف جانیوالے ٹرک کو روکا، پولیس کے مطابق ٹرک میں بھاری مقدار میں اسلحہ رکھا گیا تھا۔

پولیس حکام نے بتایا کہ ٹرک سے برآمد  کیے گئے اسلحے میں 4 ایس ایم جیز، 12 ہزار گولیاں، 35 ایس ایم جی میگزین، 4 جی تھری، 4 ایم فور رائفل، 20 میگزین، 2 پستول اور 200 گولیاں بھی شامل ہیں۔

پولیس نے ٹرک میں سوار 7 ملزمان کو بھی گرفتار کرلیا ۔ ایس ایس پی کشمور نے کہا کہ گرفتار ملزمان میں علی بخش گبول، عبدالشکور، فرمان ملک، اویس ابڑو، عبدالقادر ابڑو، مجاہد حسین اور شاہ میر سبزوئی شامل ہیں۔

ایس ایس پی نعمان ظفر نے بتایا کہ یہ اسلحہ ڈاکوؤں کے مختلف گینگ کو سپلائی کیا جانا تھا۔