جنوبی کوریا:  صدر کے بیرون ملک سفر پر پابندی

سیول: جنوبی کوریا نے اپنے صدر یون سوک یول کے بیرون ملک جانے پر پابندی عائد کر دی۔

عالمی  میڈیا کے مطابق صدر یون سوک یول پر مارشل لا لگانے کی ناکام کوشش پر ملک چھوڑنے پر پابندی عائد کر دی گئی ہے،

جنوبی کوریا میں مارشل لا کے اعلان اور اس کے خلاف ہونے والی قانون سازی کے بعد ملک  قیادت کا بحران گہرا ہوتا جا رہا ہے اور صدر سے استعفے کے مطالبات بڑھتے جا رہے ہیں۔

جنوبی کوریا کی وزارت برائے انصاف کے حکام نے بتایا کہ مارشل لانافذ کرنے پر صدر یون سوک یول پر غیر ملکی سفر پر پابندی لگانے کا فیصلہ کیا گیا، جس پر فوری عمل درآمد کر دیا گیا ہے۔

حکمران پارٹی پیپلز پاور پارٹی (پی پی پی) نے صدر یون سک یول سے خارجہ اور دیگر ریاستی امور کے اختیارات چھین کر وزیر اعظم کو تفویض کر دیے ہیں۔

کورین صدر کے خلاف غیر آئینی اقدام پر اپوزیشن اورعوام کی جانب سے مستعفی ہونے کے لیے دباؤ بڑھتا جا رہا ہے۔

واضح رہے کہ کچھ روز قبل صدر یون سوک یول نے ملک میں مارشل لا کا نفاذ کیا تھا تاہم پارلیمنٹ نے صدر کے اس اقدام کو غیر قانونی قرار دیا تھا، جس کے بعد صدر کو عوام سے معافی مانگنا  پڑی تھی۔