سندھ میں آج سے تمام مزارات کھول دئیے گئے

تفصیلات کے مطابق   سندھ میں  کورونا کے باعث بند مزارات اور درگاہیں ایس او پیز کے تحت  کھولنے کا فیصلہ کیا  گیا ہے۔  مزارات میں سماجی فاصلہ، زائرین اور عملے کے افراد کو ماسک لازمی  پہننا ہوگا۔ اس کے علاوہ حکم نامے کے مطابق تمام داخلی راستوں پر سینیٹائزر دستیاب ہوں گے۔ زائرین کو دس منٹ تک مزارات میں رہنے کی اجازت ہوگی۔ علاوہ ازیں 50 سال سے زائد عمر کے افراد، بچوں اور کھانسی بخار کی علامات والوں کو اجازت نہیں ہوگی۔حکم نامے کے مطابق مزارات پر روزانہ اسپرے اور دھلائی کرنا لازمی ہوگا، مزارات پر لنگر تقسیم کرنے پر پابندی ہوگی۔

اس کے ساتھ ساتھ سندھ میں آج سے پارکس ، ان ڈورجمز ، کھولنے کا نوٹی فکیشن بھی جاری کردیا گیا ہے ۔

خیال رہے کہ حکومت سندھ نے 19 جون کو کورونا کیسز میں خاطر خواہ کمی کے بعد پرائمری اسکول 21 جون، تفریحی پارکس اور درگاہیں 28 جون سے کھولنے کا فیصلہ کیا تھا۔

واضح رہے کہ ملک میں گزشتہ 3 ماہ کے دوران کورونا کے باعث آج سب سےکم اموات ریکارڈ ہوئیں ، ملک میں کورونا وائرس کی تیسری لہر کے دوران  مزید 20 افراد انتقال کر گئے جبکہ 914کیسز رپورٹ ہوئے ہیں۔نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں  اموات کی مجموعی تعداد22 ہزار231ہوگئی ہے،جبکہ  متاثرہ افراد کی مجموعی تعداد 9لاکھ55ہزار567ہوگئی ہے ۔