وفاقی تحقیقاتی ادارے(ایف آئی اے) کے سائبر کرائم ونگ نے میڈیکل میں داخلے کے لیے ہونے والا انٹری ٹیسٹ(ایم ڈی کیٹ) کا پرچہ لیک اور سوشل میڈیا پر وائرل کرنے والے 15 افراد کے خلاف مقدمہ درج کر کے کارروائی کا آغاز کر دیا۔

میڈیکل اینڈ ڈینٹیل  کالج ایڈمیشن ٹیسٹ 2024 کے انٹری ٹیسٹ کا پرچہ لیک ہونے پر ہیومن رائٹس اینڈ ڈیفینڈر آرگنائزیشن کے ممبر بورڈ آف ڈائریکٹرز  کی جانب سے  ایف آئی اے سائبر کرائم ونگ میں درخواست دائر کی گئی تھی۔

انکوائری افسر انسپکٹر ارفع سعید نے پیکا ایکٹ 2016 کی سیکشن 3 ،4 ،13، 14 اور 20 سمیت دیگر دفعات کے تحت مقدمہ درج کیا۔ 

ایس ایچ او سائبر کرائم ونگ اشرف جان کے مطابق مقدمے میں کنٹرولر اور ڈپٹی کنٹرولر امتحانات سمیت 15 افراد کو نامزد کیا گیا ہے جب کہ 3 ملزمان طارق عزیز سومرو، بلال شیرازی اور ایک نامعلوم کو گرفتار بھی کیا گیا ہے۔

لاہور کی انسداد دہشت گردی عدالت (اے ٹی سی) نے تھانہ شاد مان جلاؤ گھیراؤ کیس میں پاکستان تحریک انصاف کے رہنماؤں شاہ محمود قریشی ڈاکٹر یاسمین راشد اور دیگر ملزمان پر فرد جرم عائد کر دی۔

انسداد دہشتگردی عدالت نے کوٹ لکھپت جیل میں پی ٹی آئی رہنماؤں کے خلاف تھانہ شادمان جلاؤ گھیراؤ کے مقدمے کی سماعت کی،اور اے ٹی سی جج مناظر علی گل نےملزمان کو  فرد جرم پڑھ کر سنائی۔

عدالت نے سابق وزیر خارجہ شاہ محمود قریشی، سابق صوبائی وزیر صحت یاسمین راشد، سابق سینئر صوبائی وزیر میاں محمود الرشید، سینیٹر اعجاز چوہدری، سابق گورنر پنجاب عمر سرفراز چیمہ اور دیگر ملزمان پر فرد جرم عائد کردی، تاہم ملزمان  نے صحت جرم سے انکار کر دیا۔

انسداد دہشت گردی عدالت  نے تھانہ شادمان جلاؤ گھیراؤ کے مقدمے میں فرد جرم عائد کرتے ہوئے آئندہ سماعت پر گواہوں کو طلب کر لیا۔ عدالت نے سماعت 19 دسمبر تک ملتوی کر دی۔

اس کے علاوہ انسداد دہشتگردی عدالت نے عسکری ٹاور جلاؤ گھیراؤ سمیت دیگر مقدمات کی کارروائی 23 دسمبر تک ملتوی کر دی۔

دوسری جانب توشہ خانہ ٹو کیس میں بانی پی ٹی آئی  اور ان کی اہلیہ بشریٰ بی بی پر فرد جرم عائد کر دی گئی،اسپیشل سنٹرل کورٹ کے جج شاہ رخ ارجمند نے اڈیالہ جیل میں کیس کی سماعت ہوئی۔ بانی پی ٹی آئی اوربشریٰ بی بی کو عدالت میں پیش کیا گیا۔ جج شاہ رخ ارجمند نے فرد جرم پڑھ کر سنائی۔

تاہم ملزمان کی جانب سے صحت جرم سے انکار کر دیا، عدالت نے توشہ خانہ ٹو کیس کی مزید سماعت 18 دسمبر تک ملتوی کر دی۔

جنوبی افریقہ نے پاکستان کے خلاف ہونے والی تین ون ڈے میچوں کی سیریز کے لیے 15 رکنی اسکواڈ کا اعلان کر دیا ہے اور جس میں اہم افریقی کھلاڑیوں کی واپسی ہوئی ہے۔
ون ڈے میچوں میں جنوبی افریقی ٹیم کی قیادت ٹمبا بواما کریں گے۔ جبکہ اسکواڈ کے دیگر کھلاڑیوں میں
کاگیسو ربادا، ہینرک کلاسن، ڈیوڈ ملر، کیشو مہاراج اور تبریز شمسی کی ون ڈے اسکواڈ میں واپسی ہوئی ہے جبکہ 18 سالہ فاسٹ باؤلر کفوینا مافاکا کو بھی اسکواڈ کا حصہ بنایا گیا ہے جو ون ڈے میں اپنا ڈیبیو کریں گے۔
واضح رہے کہ کفوینا مافاکا نے رواں سال انڈر 19 ورلڈ کپ میں سب سے زیادہ وکٹیں بھی حاصل کی تھیں۔

جنوبی افریقہ کا اسکواڈ درج ذیل کھلاڑیوں پر مشتمل ہے۔
ٹیمبا باوما (کپتان)، اوٹنیل بارٹمین، ٹونی ڈی زورزی، مارکو جانسن، ہینرک کلاسن (وکٹ کیپر)، کیشو مہاراج، کوینا مافاکا، ایڈن مارکرم، ڈیوڈ ملر، اینڈائل، کاگیسو ربادا، ٹریسٹان اسٹبس، ریان رکیلٹن، تبریز شمسی اور ریسی وین دیر ڈیسن۔دونوں ممالک کے درمیان ون ڈے سیریز کا آغاز 17 دسمبر سے ہو گا۔