سینیٹ کا اسرائیل کی فلسطین کے خلاف منظم کارروائیوں پر شدید تشویش کااظہار

سینیٹ نے آج ایک متفقہ قرارداد منظور کی ہے  جس میں غزہ اور دیگر ممالک پر اسرائیلی بمباری کی مذمت کی گئی ہے۔

شیری رحمان کی جانب سے پیش کی گئی قرارداد میں اسرائیل کی فلسطین کے خلاف منظم کارروائیوں پر شدید تشویش کااظہارکیاگیا ہے ۔

ایوان نے فلسطین کے عوام کے ساتھ اپنی یکجہتی کا اعادہ کیا اور فلسطین کی ایک قابل عمل ، خودمختاراورملحقہ ریاست کے قیام پر زوردیا جو القدس الشریف کے دارالحکومت کے طورپر 1967 سے پہلے کی سرحدوں کے بین الاقوامی سطح پر متفقہ اصولوں پرمبنی ہو ۔

ایوان نے شام میں حکومت کے انہدام کے بعد پیدا ہونے والے سیاسی خلاء کو بعض قوتوں کی جانب سے اپنے مقاصد کیلئے استعمال کرنے کے خدشے کا اظہارکیا  جس کو اسرائیل اپنے یکطرفہ ایجنڈے کو آگے بڑھانے کیلئے استعمال کررہا ہے ۔

سینٹ نے عالمی برادری سے مطالبہ کیاکہ وہ فلسطینیوں کے تحفظ کیلئے فیصلہ کن کارروائی کرے جنگی جرائم کیلئے اسرائیل کا محاسبہ کرے اوربین الاقوامی انسانی قانون پر عملدرآمد کو یقینی بنائے۔