چیمپئنز ٹرافی ہائبرڈماڈل کے تحت ہو گی، آئی سی سی نے منظوری دے دی، بھارتی میڈیا کا دعویٰ

بھارتی میڈیا کی جانب سے دعویٰ کیا گیا  ہے کہ آئی سی سی نے چیمپئنز ٹرافی کے لیے ہائبرڈ ماڈل کی منظوری دے دی ۔

بھارتی میڈیا  کا کہنا ہے کہ پاکستان کرکٹ بورڈ( پی سی بی) کی جانب سے پیش کردہ ہائبرڈ ماڈل کی منظوری سے چیمپئنز ٹرافی کے میچز  پاکستان اور دبئی میں ہوں گے۔

بھارتی میڈیا کی جانب سے یہ بھی دعویٰ کیا گیا ہے کہ بورڈ کا ان آفیشل اجلاس ہوا جس میں آئی سی سی نے ہائبرڈ ماڈل کی منظوری دی اور اس ضمن میں پاکستان اور بھارت میں اصولی معاہدہ بھی ہو گیا ہے۔

بھارتی میڈیا کا کہنا ہے کہ ہائبرڈ ماڈل کے تحت  پاکستان کرکٹ ٹیم 2026 کے ٹی 20 ورلڈ کپ کے لیے بھارت نہیں جائے گی،اور پاکستان اس دوران اپنے گروپ میچز سری لنکا یا دبئی میں کھیلے گا،جبکہ بھارت چیمپئنز ٹرافی 2025 کے  میچ  دبئی میں کھیلے گا۔

پی سی بی اور بی سی سی آئی بھارت کے مقابلے دبئی میں کرانے پر رضامند ہے جبکہ ٹی 20 ورلڈ کپ 2026 میں پاکستان اور بھارت کا مقابلہ کولمبو میں ہوگا۔

بھارتی میڈیا کا کہنا ہے کہ پی سی بی اس معاہدے کے لیے کوئی مالی معاوضہ وصول نہیں کرے گا، چیمپئنز ٹرافی کے مقابلے پاکستان میں تین وینیوز اور بھارت کے مقابلے دبئی میں ہوں گے۔

پاکستان کو 2027 کے آئی سی سی ویمنز ٹورنامنٹ کی میزبانی بھی ملے گی، جبکہ 2026 کے ٹی20 ورلڈ کپ کے ناک آؤٹ میچز کا معاملہ بعد طے ہو گا۔

بھارتی میڈیا کے مطابق ابھی تک کوئی  تحریری طور پر معاہدہ نہیں ہوا اور ابھی صرف اصولی معاہدہ ہوا ہے۔

ذرائع کے مطابق چیمپئنز ٹرافی سے متعلق حتمی فیصلہ کل ہوجائے گا، 3  سال کے فیوژن ماڈل کو کل آئی سی سی سے منظوری ملنے کا امکان ہے۔

واضح رہے کہ آئی سی سی چیمپئنز ٹرافی2025 کی میزبانی پاکستان کے پاس ہے جو کہ 19 فروری سے 9 مارچ تک شیڈول ہے مگر بھارت کی ہٹ دھرمی کے باعث ٹورنامنٹ کے  شیڈول کا ابھی تک اعلان نہیں ہو سکا۔