ملک میں سردی کی شدت میں اضافہ، ہنزہ میں درجہ حرارت منفی 18 تک پہنچ گیا

ملک کے بیشترعلاقوں میں موسم سرد اور خشک ہے جب کہ پہاڑی علاقوں میں برفباری  ہونے سے سردی کی شدت میں اضافہ ہوگیا ہے۔

محکمہ موسمیات  کے مطابق کراچی میں گزشتہ روز درجہ حرارت 14 ڈگری سینٹی گریڈ ریکارڈ کیا گیا۔

محکمہ موسمیات  کا کہنا ہے کہ ہنزہ میں پارہ منفی 18 ڈگری، استور میں منفی 17 ڈگری، سکردو میں منفی 10 اور کوئٹہ میں کم از کم ایک ڈگری سینٹی گریڈ ریکارڈ کیا گیا۔

اسلام آباد اور راولپنڈی میں پارہ 4، لاہور اور پشاور میں 7 ڈگری ریکارڈ کیا گیا۔

دوسری جانب لاہور سمیت پنجاب کے بیشتر شہروں میں بھی شدید سردی ریکارڈ کی گئی ، بلوچستان کے بیشتر اضلاع میں موسم سرد اورخشک جبکہ پہاڑی علاقوں میں شدید سرد رہنے کا امکان ہے۔

پنجاب کے پہاڑی علاقوں مری، گلیات اور گرد و نواح میں شدید سرد رہنے کا امکان ہے۔