نئے سال 2026 کا پہلا سپر مون آج ہوگا،پاکستان سمیت متعدد ممالک میں دیکھا جا سکے گا

ویب ڈیسک:  نئے سال 2026 کا پہلا سپر مون آج نظر آئے گا، یہ اکتوبر 2025 سے جاری سپرمونز کے سلسلے کا آخری سپرمون ہوگا۔

اسپیس اینڈ اپر ایٹماسفیئر ریسرچ کمیشن (سپارکو) ترجمان کے مطابق یہ سپر مون روایتی طور پر وولف مون کہلاتا ہے،اس سے قبل جاری سپر مون سلسلے کا آخری سپر مون اکتوبر 2025 سے اُفق پر رونما ہوا تھا، اِس بار کواڈرینٹڈ شہابی بارش بھی عروج پر ہو گی۔

ترجمان نے بتایا کہ پاکستان میں سپر مون شام 5:51 بجے طلوع ہوگا، چاند کی روشنی 99.8 فیصد تک ہوگی، 3 اور 4 جنوری کو یہ دیکھا جا سکتا ہے۔

ترجمان کے مطابق زمین اور چاند کے درمیان فاصلہ تقریباً 3 لاکھ 62 ہزار کلومیٹر ہے، چاند عام طور پر اس بار پورے چاند سے 6-7 فیصد بڑا اور 10 فیصد روشن دکھائی دے گا، انہوں نے مزید بتایا کہ سپرمونز کا اگلا سلسلہ نومبر 2026 میں شروع ہوگا۔

خیال رہے کہ وولف مون عموماً سال کا پہلا فل مون ہوتا ہے اور اس کا نام سردیوں کی راتوں میں بھیڑیوں کی چیخ و پکار سے موسوم کیا گیا ہے، 2026 میں یہ سپر مون کے طور پر شمار ہوگا کیونکہ یہ زمین کے قریب ترین مقام پر ہوگا، جس سے اس کی روشنی اور حجم نمایاں بڑھ جائے گا۔