ڈگری حاصل کرنے والے طلبہ کو مبارکباد پیش کرتا ہوں، بلاول بھٹو کا سکھر میں تقریب سے خطاب

چیئرمین پیپلز پارٹی بلاول بھٹو زرداری نے کہاہے ہمیں ماحول دوست اور لوگوں کے گھروں کیلئے بجٹ بنانا ہوگا ۔  

تفصیلات کے مطابق بلاول بھٹو زرداری نے سکھر میں تقریب سے خطاب کرتے ہوئے کہا  ڈگری حاصل کرنے والے طلبہ کو مبارکباد پیش کرتا ہوں، کامیاب طلبہ اپنی زندگی کے نئے دور میں داخل ہونے جارہے ہیں،  آپ نے عملی زندگی میں ملک کے لئے خدمات انجام دینی ہیں،تعلیم ایک ایسا ہتھیار ہے جو کوئی نہیں چھین سکتا،تعلیم نوجوانوں کو اپنے اہداف کے حصول میں مدد دیتی ہے، نوجوان پاکستان کا مستقبل ہیں، تعلیم یافتہ نوجوان ہی ملک کی بہتر انداز میں خدمت کرسکتے ہیں،نوجوانوں نے عملی زندگی میں محنت اور جدوجہد کو اپنا شعار بنانا ہے،نوجوان دنیا بھر میں اپنے علم کی بدولت اعلیٰ مقام حاصل کرسکتے ہیں۔  

چیئرمین پیپلز پارٹی نے کہانوجوان نسل کا انفرا اسٹرکچر انٹر نیٹ اور بینڈود ہے، موٹرویز اور ٹرینیں ہمارے دور کے انفرااسٹرکچر نہیں ہیں، آپ کو اور آپ کے انفراسٹرکچر کو کنٹرول کرنے کی کوشش کی جائیگی، ہم سب مل کر ملک کا بین الاقوامی سطح پر تشخص بہتر بنائیں گے، موہنجودڑو میں ہزاروں سال پہلے اربن ڈرینج سسٹم موجود تھا، ہمیں ماحولیاتی تبدیلی کے چیلنج کا سامنا ہے،   ہمیں سندھ کی ترقی کی اسی میراث کو لے کر آگے چلنا ہے، پی ایس ڈی پی دیکھیں،موسمیاتی خطرے کیلئے کوئی پلاننگ نہیں، افسوس ہے کہ70سال سے بابو بیٹھ کر بجٹ بناتے ہیں، اس سے بھی زیادہ بزرگ سیاستدان بجٹ منظور کرا لیتے ہیں، ہمیں بجٹ بنانا ہے تو ماحول دوست بجٹ اور لوگوں کیلئے گھر بنانا  ہوں گے۔  

انہوں نے  کہا  بینظیر بھٹو شہید نے آئی بی اے کا سنگ بنیاد رکھا، آئی بی اے عالمی سطح پر بہترین تعلیمی ادارہ ہے، این آئی سی وی ڈی میں ملک بھر سے آنیوالے مریضوں کا علاج کیا جاتا ہے، سندھ حکومت صحت کے شعبے میں اہم خدمات انجام دے رہی ہے،مختلف ملکوں سے طلبہ حصول علم کیلئے آئی بی اے میں داخلہ لے رہے ہیں، سندھ عظیم تاریخ سے مالا مال صوبہ ہے، ہم دنیا بھر کی تعلیمی رینکنگ میں اپنی پوزیشن بنا رہے ہیں۔