پاک ، چین علاقائی شراکت داری ، چین کے بڑے مجسمہ ساز یاؤن زیکون کا پاکستان کو بڑا تحفہ ، وزیراعظم

وزیراعظم شہبازشریف نے کہا ہے کہ پاک چین علاقائی شراکت داری خطے کے استحکام کیلئے نہایت اہم اور عالمی چیلنجز کے تناظر میں دنیا بھر میں امن کے لئے امید کی کرن ہے۔

اسلام آباد میں قائداعظم محمد علی جناح اور چین کے انقلابی لیڈر اور چین کی کمیونسٹ پارٹی کے سابق چیئرمین ماؤ زیڈونگ  کے مجسموں کی تقریب رونمائی سے خطاب کرتے ہوئے اپنے خیالات کا اظہار کیا ۔ 

یہ مجسمے چین کے بڑے مجسمہ ساز یاؤن زیکون نے وزیراعظم کوپچیس دسمبر کو قائداعظم محمد علی جناح اور چھبیس دسمبر کو مائوزی ڈونگ کی سالگرہ کے موقع پر پیش کئے۔

وزیراعظم نے اس موقع پر گفتگو کرتے ہوئے کہا کہ پاک چین سدابہار تزویراتی شراکت داری نئی بلندیوں کو چھورہی ہے جس کے تحت دفاع اور دفاعی پیداوار سے لے کر زرعی شعبوں میں تعاون کیا جارہاہے۔

انہوں نے کہا کہ اگلے سال کے اوائل میںپاکستانی طلبا زراعت میں جدید تعلیم کے حصول کیلئے چین جارہے ہیں اور و ہ پاکستان اور چین کے درمیان پل کاکردار اداکریںگے جس سے ہماری دوستی کو نئی جہت ملے گی۔

انہوں نے کہا کہ مجسموں کا یہ تحفہ پاکستان اور چین کے درمیان ہمیشہ غیرمتزلزل د وستی کی علامت رہے گا۔