بلاول بھٹو نے بجٹ کی منظوری کو غیر قانونی قرار دےدیا

پاکستان پیپلزپارٹی کے چیئرمین بلاول بھٹو زرداری نے میڈیا سے گفتگو کرتے ہوئے کہا کہ اسپیکر نے آج قومی اسمبلی  ممبران کے حق پر ڈاکا ڈالا ہے،اس معاملے سے متعلق اسپیکر قومی اسمبلی اسدقیصر کو خط بھی لکھا ہے،ہم سمجھتے ہیں کہ بجٹ  کی منظوری غیر قانونی  ہے۔

بلاول بھٹو نے کہا کہ  فنانس  بل کی زبانی منظوری دی گئی تو  میں نے  خود کھڑے ہو کر مخالفت کی، قومی اسمبلی کے ہر ممبر کا حق ہوتا ہے کہ وہ  ایوان میں اپنی رائے دے،آج قومی اسمبلی میں بہت بری  مثال قائم کی گئی، اسپیکر نے آج  ارکان قومی اسمبلی کے حق پر ڈاکا ڈالا ہے،پاکستان میں منتخب نمائندوں کو بات کرنے کا حق نہیں دیا جاتا۔

چیرمین پی پی  بلاول بھٹو نے میڈیا سے گفتگو کرتے ہوئے کہا کہ یہ آئی ایم ایف کے ساتھ مل کر بجٹ بناتے ہیں اور پھر پاس کراتے ہیں،اب بجٹ کو بھی دھاندلی کی بنیاد پر بنایا جارہا ہے،آج پورا پاکستان قومی اسمبلی کی طرف دیکھ رہاہے۔بجٹ کی منظوری کا عمل غیر قانونی ہے، انہوں نے آئی ایم ایف بجٹ  زبردستی منظور کرایا ہے،بجٹ کو کراچی سے لے کر کشمیر تک بے نقاب کریں گے۔

چیئرمین پی پی کا کہنا تھا کہ غربت ،مہنگائی اور بے روزگاری میں تاریخی اضافہ ہورہا ہے،حکومت نہ سننے کو تیار ہے اور نہ دیکھنے کو تیار ہے،میں اپنے وعدے پرپورا اترا میں اور ہمارے ارکان ایوان  میں موجودتھے۔