ہش منی کیس، امریکی عدالت نے ڈونلڈ ٹرمپ کو مجرم قرار دے دیا

نیویارک: نیویارک کی اپیل کورٹ نے ہش منی کیس کا فیصلہ سناتے ہوئے نومنتخب امریکی صدر ڈونلڈ ٹرمپ کو مجرم قرار دے دیا۔
امریکی میڈیا کے مطابق عدالت نے ہش منی کیس کا فیصلہ جاری کرتے ہوئے ڈونلڈ ٹرمپ کو مجرم قرار دے دیا، عدالت نے اپنے فیصلے میں مزید کہا کہ مجرم قرار دینےکےباوجود بھی ڈونلڈ ٹرمپ صدر کے عہدے کا حلف اٹھا سکتے ہیں۔
،فوجداری عدالت نے فیصلے میں کہا کہ نومنتخب صدر کو سزا نہیں دے رہے،عدالتی فیصلے کے تحت ٹرمپ کو نہ تو جیل بھیجا جا ئے گا اور نہ ہی ان پر کوئی جرمانہ عائد کیا جائے گا،عدالت نے پیسے دے کر حقائق چھپانے کا جرم ٹرمپ کے ریکارڈ میں شامل کرنے کا حکم دیدیا۔
عدالتی فیصلے کے بعدڈنلڈ ٹرمپ امریکی تاریخ کے پہلے صدر ہوں گے جو مجرمانہ ریکارڈ کے ساتھ صدارت کا عہدہ سنبھالیں گے۔
واضح رہے کہ گزشتہ سال مئی میں امریکی عدالت نے فحش اداکارہ کو رقم کی ادائیگی سے متعلق کیس میں ٹرمپ پر عائد الزامات درست قرار دیتے ہوئے انہیں مجرم قرار دیا تھا۔
ڈونلڈ ٹرمپ پر فحش فلموں کی اداکارہ سٹارمی ڈینئلز کو 1 لاکھ 30 ہزار ڈالر کی ادائیگی سے متعلق 34 الزامات عائد کیے گئے تھے،  جن کو جیوری کی جانب سے تمام 34 الزامات کو درست قرار دیا گیا تھا۔
ڈونلڈ ٹرمپ پر الزام تھا کہ ان کے اسٹارمی ڈینئلز کے ساتھ جنسی تعلقات تھے اور انہیں چھپانے کے لیے 2016 کے صدارتی انتخابات کے موقع پر اسٹارمی ڈینئلز کو رقم دی گئی تھی، جس کے نتیجے میں ڈونلڈ ٹرمپ الیکشن جیت گئے تھے،ڈونلڈ ٹرمپ کو سزائے سنائے جانے کے لیے کیس کی مزید سماعت ابتدائی طور پر 11 جولائی 2024 کو ہونی تھی جو متعدد مرتبہ ملتوی ہوئی۔