پی ٹی آئی نےحکومت سے مذاکرات کے حوالے سے ہمیں اعتماد میں نہیں لیا، سربراہ جے یو آئی

کراچی :جمیعت علماء اسلام (جے یو آئی ف) کے سربراہ مولانا فضل الرحمان  نے کہا کہ پی ٹی آئی نے حکومت سے مذاکرات کے حوالے سے ہمیں اعتماد میں نہیں لیا۔
 کراچی میں میڈیا سے گفتگو کرتے ہوئے مولانا فضل الرحمان نےکہا کہ معیشت کی بہتری پر حقائق سامنے آنے چاہئیں، معیشت کی بہتری کے صرف اشاریے مل رہے ہیں،ان کامزید کہنا تھا کہ ملکی معیشت کی بہتری ہماری آرزو ہے، عوام کو ثمرات ملیں گے تو ثابت ہوگا معیشت بہتر ہوئی، جب تک روپے کی قدر کو تقویت نہیں ملے گی عام آدمی کو ریلیف نہیں مل سکتا۔
پاکستان اور تحریک انصاف اور حکومت کے درمیان ہونے والے مذاکرات کے حوالے سےسربراہ جے یو آئی نے گفتگو کرتے ہوئے کہا کہ پی ٹی آئی نے مذاکرات کے حوالے سے ہمیں اعتماد میں نہیں لیا، ہمیں نہیں پتا وہ کیا کہہ رہے ہیں اور کیا کر رہے ہیں، سیاستدانوں پر افسوس ہے کہ سمجھوتہ کرلیتے ہیں، ملک کا نظام بہتر کرنے کے لیے ایک جگہ ٹھہرنا ہوگا۔
کالا باغ ڈیم اور پنجاب کی جانب سے نئی نہروں کے سوال پر مولانا فضل الرحمان کا کہنا تھا کہ تمام معاملات قومی اتفاق رائے سے حل ہونے چاہئیں۔
مدارس بل کے حوالے سے مولانا فضل الرحمان کا کہناتھا کہ پارلیمنٹ کی سطح پرمدارس رجسٹریشن کے لیے قانون سازی ہو چکی، صدارتی آرڈیننس کے ذریعے مدارس رجسٹریشن میں ریلیف دیا گیا،ہمیں اعتراض نہیں، ان کا کہنا تھا کہ حکومت نے کچھ مدارس کو اپنے کنٹرول میں رکھنے کے لیے اقدامات کیے،۔
سربراہ جے یو آئی کہنا تھا کہ خالد مقبول نے مدارس بل پر میرے گھرآکر سمجھنے کی کوشش کی، خالد مقبول صدیقی وزیرتعلیم ہیں لیکن وہ میرے گھر زیر تعلیم ہیں۔ان کا کہناتھا کہ قومی معاملات کا حل اتفاق رائے سے نکلنا ضروری ہے، بتایا جائے مدارس کے معاملے پر تاخیر کی وجہ کیا ہے؟انہوں نے مزید کہا کہ حکومتیں تو مارشل لاء دورمیں بھی مدت پوری کرلیتی ہیں، سیاستدان جمہوریت،آئین اوراصولوں پرسمجھوتاکرلیتےہیں۔