لاس اینجلس میں تا حال آگ پرقابونہ پایا جا سکا،ہلاکتوں کی تعداد16ہوگئی

امریکی شہر لاس اینجلس میں منگل سے لگی تاریخ کی بدترین آگ پر قابو نہ پایا جاسکا ہلاکتوں کی تعداد16ہوگئی۔

رپورٹ کے مطابق 12 ہزار سےزائد مکان اور عمارتیں راکھ کا ڈھیر بن گئیں ، 2 لاکھ سے زائد افراد نقل مکانی پر مجبور ہوگئے۔کچھ علاقوں میں فوری انخلا کے نئے احکامات جاری کردیے گئے۔آگ میں 16افراد ہلاک اور سیکڑوں زخمی ہوگئے، 13 افراد تاحال لاپتہ ہیں جن کی تلاش کا کام جاری ہے۔

لاس اینجلس کاؤنٹی میں ہیلتھ ایمرجنسی نافذ کردی گئی ہے، تیز ہواؤں سے آگ مزید پھیلنے کا خدشہ ہے جس کےتحت ریڈ فلیگ وارننگ جاری کردی گئی۔

12ہزارسےزائد فائر فائٹرز،ساڑھے1100 فائر انجن،60 طیارے اور143 واٹر ٹینکر آگ بجھانےکی کوششوں میں مصروف ہیں۔میکسیکو اور کینیڈا نے بھی مدد فراہم کرنے کا اعلان کیا ہے۔

دوسری جانب ہالی وڈ ستاروں کو بھی اپنے پُرتعیش گھرچھوڑنا پڑے،لوٹ مار کی وارداتوں پر متاثرہ علاقوں میں رات کے وقت کرفیو نافذ کردیا گیا ہے۔