پاکستان نے مقبوضہ کشمیر میں ڈرون حملہ سے متعلق بھارتی الزامات مسترد

تفصیلات کے مطابق  پاکستان نے مقبوضہ جموں و کشمیر میں ڈرون حملہ سے متعلق بھارتی الزامات مسترد کر دیے ہیں۔

اس حوالے سے ترجمان دفتر خارجہ زاہد حفیظ چوہدری کا کہنا ہے کہ  مبینہ ڈرون حملے سے متعلق بھارتی وزیر داخلہ کشن ریڈی کا بیان غیر ذمہ دارانہ ہے۔بھارت ڈرون حملہ کے ثبوت چھپا کر روایتی الزام تراشی کا راستہ اپنا رہا ہے۔

زاہد حفیظ چوہدری نے کہا کہ  اندرونی خامیوں کا الزام پاکستان پر دھرنا بھارت کا وطیرہ رہا ہے، بی جے پی حکومت فالس فلیگ آپریشن کے ذریعہ پاکستان کو مورد الزام ٹھہرانا چاہتی ہے۔انہوں نے کہا کہ بھارت کے اوچھے ہتھکنڈے مقبوضہ جموں و کشمیر میں سنگین جرائم پر پردہ نہیں ڈال سکتے۔

چند دن قبل   مقبوضہ کشمیرجموں ائرپورٹ کے ہائی سیکیورٹی ٹیکنیکل ایریا میں دو دھماکے ہوئے تھے۔ دھماکوں کے باعث ایک شہری جاں بحق اور 3 زخمی ہو گئے تھے۔