آج غزہ میں بندوقیں خاموش ہوگئیں، ہماری مؤثر پالیسی سے جنگ بندی معاہدہ ہوا،امریکی صدر

واشنگٹن :امریکا کے صدر جوبائیدن نے اسرائیل اور حماس کے درمیان جنگ بندی معاہدے پر کہا ہے کہ آج غزہ میں بندوقیں خاموش ہوگئیں ہیں، ہماری مؤثر پالیسیوں کی وجہ سے غز ہ میں جنگ بندی ہوئی۔
اپنے اقتدار کے آخری روز امریکی  صدر جو بائیڈن نےمیڈیا سے گفتگو کرتے ہوئے کہا کہ غزہ میں شہریوں کی امداد کے لئے سیکڑوں امدادی ٹرک داخل ہو رہے ہیں، غزہ میں ہونے والی جنگ بندی اس معاہدے کا حصہ ہے جو میں نے مئی میں تجویز کی تھی، ہماری مؤثر پالیسی کے باعث جنگ بندی معاہدہ نتیجہ خیز ہوا۔
جوبائیڈن نے مزید کہا کہ غزہ سے رہا کئے جانے والے قیدیوں میں امریکی شہری بھی شامل ہیں، معاہدے کے اگلے مرحلے میں یرغمالیوں میں شامل اسرائیلی فوجی رہا ہوں گے، غزہ معاہدے کا دوسرا مرحلہ حماس کو اقتدار سے ہٹانے کو یقینی بنائے گا۔
امریکی صدر نے کہاکہ اب غزہ معاہدے پر عمل درآمد ٹرمپ انتظامیہ پرمنحصرہے۔
دوسری جانب اسرائیل نے جیلوں میں قید 90 فلسطینیوں کو رہا کر دیا جن میں 69 فلسطینی خواتین اور 21 بچے شامل ہیں۔