غزہ:تباہ حال عمارتوں کے ملبے سے 200 لاشیں اوربڑی مقدار میں بغیر پھٹے بم برآمد

غزہ:تباہ حال عمارتوں کے ملبے سے 200 لاشیں اور بغیر پھٹے بم برآمد
غزہ:غزہ میں اسرائیلی بمباری کے نتیجے میں تباہ شدہ عمارتوں کے ملبے سے مزید 200 لاشیں برآمد ہوئی ہیں،جبکہ بڑی مقدار میں بغیر پھٹے بم بھی برآمد ہوئے ہیں۔
عالمی میڈیا کے مطابق غزہ کے محکمہ شہری دفاع اور طبی عملے نے جنگ بندی کے بعد سے اب تک عمارتوں کے ملبے سے 200 لاشیں برآمد کی ہیں۔
اس حوالے سے شہری دفاع کے حکام کا کہنا ہے کہ بھاری مشینری نہ ہونے کے باعث لاشیں نکالنے میں مشکلات کا سامنا ہے،ان کا کہنا ہے کہ فضائی بمباری میں اسرائیل نے متعدد مشینیں بھی تباہ کردی ہیں جبکہ 100 سے زائد ملازمین کو شہید کردیا، جبکہ تا حال 10 ہزار فلسطینیوں کی لاشیں نہیں مل سکی ہیں۔
 دوسری جانب اقوام متحدہ کے مطابق، 42 ملین ٹن ملبے میں موجود بارودی مواد کو صاف کرنے کے لیے 50 کروڑ ڈالر کی خطیر رقم درکار ہوگی، اقوام متحدہ کی رپورٹ میں مزید کہا گیا کہ جنگ کے نتیجے میں غزہ میں 5 کروڑ ٹن ملبہ جمع ہو چکا ہے جسے صاف کرنے میں 21 سال لگ سکتے ہیں، جب کہ اس پر 1.2 ارب ڈالر لاگت آئے گی۔