جنوبی کوریا : سابق صدر پر بغاوت کے الزام میں فردجرم عائد 

سیئول :جنوبی کوریا کے سابق صدر یون سک یول پر بغاوت کے الزام میں فرد جرم عائد کر دی گئی ۔
غیر ملکی میڈیا کے مطابق جنوبی کوریا کے پراسیکیوٹرز نے سابق صدر یون سک یول پر فرد جرم عائد کی،گزشتہ ہفتے اینٹی کرپشن نے فرد جرم عائد کرنے کی سفارش کی تھی۔
خیال رہے کہ جنوبی کوریا کے سابق صدر یون سک یول نے 3 دسمبر کو ملک میں مختصر مارشل لاء لگایا تھا مگر اپوزیشن جماعتوں اور عوام کے شدید ردعمل کے باعث سابق صدر کوکچھ ہی گھنٹوں بعد مارشل لاء اٹھا نا پڑا تھا۔
صدر کی جانب سے مارشل لا کے نفاذ کے ردعمل پر اپوزیشن کی جانب سے یون سک یول کے خلاف مواخذے کی تحریک لائی گئی تھی جو پہلی مرتبہ ناکام رہی تاہم دوسری بار اپوزیشن پارلیمنٹ سے تحریک منظور کروانے میں کامیاب رہی تھی۔
جنوبی کوریا کے تحقیقاتی اداروں نے یون سک یول کے خلاف بغاوت اور اختیارات کے  ناجائز استعمال کی تحقیقات شروع کر رکھی تھیں ، سابق صدر کو چند روز قبل گرفتار کیا گیا تھا۔