پاکستان بھر میں اسلام آباد کو ماڈل کے طور پر پیش کریں گے ، وزیر اعظم

وزیر اعظم  محمد شہباز شریف نے کہا ہے کہ پاکستان بھر میں اسلام آباد کی خوبصورتی کو مثال بنائیں گے۔

وزیر اعظم شہباز شریف نے جناح اسکوائر کی افتتاحی تقریب سے خطاب کرتے ہوئے کہا کہ آج اسلام آباد کی ٹریفک کے بہاؤ کے حوالے سے جناح اسکوائر کا منصوبہ پایہ تکمیل تک پہنچا ہے، جناح اسکوائر منصوبے سے اسلام آباد کی ٹریفک کے بہاؤ میں بہتری آئے گی۔

شہباز شریف نے کہا میں وزیر داخلہ محسن نقوی اور سی ڈی اے کی پوری ٹیم کو مبارکباد پیش کرنا چاہتا ہوں،جس ذمہ داری سے 72 دن میں یہ منصوبہ مکمل کیا گیا وہ قابل ستائش ہے، اور جناح اسکوائر منصوبے کو 72 دنوں میں مکمل کر کے ریکارڈ بنایا گیا ہے، محسن نقوی نے اسلام آباد میں پنجاب اسپیڈ کو محسن اسپیڈ میں بدل دیا ہے۔

انہوں نے کہا کہ منصوبے سے وقت اور ایندھن کی بچت کے ساتھ آلودگی میں بھی کمی آئے گی  اور گاڑیاں رک کر دھواں نہیں چھوڑیں گی بلکہ چلتی رہیں گی۔ 

انہوں نے کہا کہ ریکارڈ میں مزید اضافہ ہو رہا ہے جس پر خوشی ہونی  چاہئے ، یہی وہ طریقہ ہے جو قوموں کی زندگیاں بدل دیتا ہے، اور باقی منصوبوں کو بھی اسی رفتار سے تکمیل تک پہنچائیں گے۔ یہاں پر سرکاری عمارات میں بھی رینوویشن کی ضرورت ہے۔

انہوں نے ہدایت کی کہ اسلام آباد کی خوبصورتی میں بے شمار اضافہ کریں، اور امید ہے اگلے چند ماہ میں آپ بیوٹیفکیشن کے منصوبے کو مکمل کریں گے،  انڈرپاسز کی دیواروں پر بیوٹیفکیشن کریں۔ 

وزیر اعظم نے کہا کہ پاکستان بھر میں اسلام آباد کی خوبصورتی کو مثال بنائیں، اور مجھے یقین ہے آپ بیوٹیفکیشن کے منصوبے کو جلد تکمیل تک پہنچائیں گے، چیئرمین سی ڈی اے علی رندھاوا کو بھی شاباش دیتا ہوں۔