وزیر اعظم کی ہدایت پر لبنان، غزہ اور شام کے متاثرین کیلئے 23 ویں امدادی کھیپ روانہ

کراچی:پاکستان نے لبنان، غزہ اور شام کے متاثرین کے لیے 23ویں امدادی کھیپ روانہ کر دی۔
وزیر اعظم شہباز شریف کی ہدایت پر این ڈی ایم اے کی جانب سے غزہ، لبنان اور شام کے لیے امداد کی فراہمی کا سلسلہ جاری ہے۔
 این ڈی ایم اے نے الخدمت فاؤنڈیشن کے تعاون سے امدادی کھیپ روانہ کی۔
این ڈی ایم اے حکام کے مطابق امدادی سامان کی کھیپ جناح انٹرنیشنل ایئر پورٹ کراچی سے روانہ کر دی گئی ہے،کھیپ میں ڈبہ پیک گوشت، خشک دودھ، کمبل، کپڑے، خیمے اور گرم بستر پر مشتمل 50 ٹن امدادی سامان فلسطین کے لیے روانہ کیا گیا ہے۔
این ڈی ایم اے لبنان، غزہ اور شام کے لیے مجموعی طور پر 1 ہزار 803 ٹن امدادی سامان بھجوا چکا ہے۔
حکومت پاکستان لبنان، فلسطین اور شام کی جنگ زدہ عوام کی ضروریات کے مطابق امدادی سامان بھیجنے کے سلسلے کو جاری رکھے ہوئے ہے۔