صدر مملکت پرنس کریم آغا خان کے انتقال پر تعزیت کیلئے پرتگال روانہ

اسلام آ باد:صدرمملکت آصف علی زرداری پرنس کریم آغا خان چہارم کے انتقال پر تعزیت کے لیے لزبن روانہ ہوگئے۔
ذرائع کے مطابق صدر آصف علی زرداری آج پرتگال کے شہر لزبن روانہ ہوگئے جہاں وہ پرنس کریم آغا خان چہارم کے انتقال پر ان کے جانشین پرنس رحیم آغا خان پنجم سے تعزیت کریں گے۔
ذرائع نے مزید بتایا کہ دورے کے دوران صدر مملکت پرتگال کے صدر مارسیلو ریبیلو ڈی سوسا سے بھی ملاقات کریں گے۔
واضح رہے کہ صدر مملکت آصف علی زرداری گزشتہ روز ہی اپنا 5 روزہ دورہ چین مکمل کرکے وطن واپس پہنچے تھے۔
خیال رہے کہ گزشتہ روز پرتگال کے شہر لزبن میں اسماعیلی مسلم کمیونٹی کے امام پرنس کریم آغا خان چہارم کی آخری رسومات ادا کردی گئیں تھیں ،ان کی تدفین آج مصر کے شہر اسوان میں کی گئی۔
 وزیر خزانہ محمد اورنگ زیب نے پرنس کریم آغا خان کی نماز جنازہ میں خصوصی شرکت کی،اور اسماعیلی کمیونٹی کے 50 ویں امام پرنس رحیم آغا خان سے بھی ملاقات کی ۔
ملاقات میں وزیر خزانہ محمد اورنگزیب نے صدر، وزیر اعظم اور پاکستانی عوام کی جانب سے اظہار تعزیت کیا۔
دوسری جانب پرنس کریم آغا خان چہارم کے انتقال پر کل پاکستان میں یومِ سوگ منایا گیا، ملک میں اور بیرونِ ملک پاکستانی سفارت خانوں میں قومی پرچم سرنگوں رہا۔