غیر ملکی ایئرلائنزکاپاکستانیوں کےساتھ ناروا سلوک، ہزاروں مسافر خوار

ذرائع کے مطابق خلیجی خصوصا قطری اور ترکی کی ائیرلائنز نے پاکستانیوں کو کورونا کی تیسری لہر کا ذمہ دار ٹھہراتے ہوئے پروازیں منسوخ کردیں ۔ غیر ملکی ائیرلائنز نے بغیر اجازت نامے طلب کئے ریونیوکمانے کیلئےپروازیں بیچیں  اور بعد میں منسوخ کردیں ، جس کے باعث   ہزاروں پاکستانی مہنگے دام دینے کے باوجود دیار غیر میں محصور ہوکر رہ گئے ۔

ذرائع ایوی ایشن ڈویژن کا اس حوالے سے کہنا ہے کہ 36ہزار  پاکستانی صرف دوحہ میں ٹکٹیں ہونے کے باوجود پاکستان آنے کیلئے منتظر   ہیں ، جبکہ ترکی میں بھی  مزید 12ہزار  پاکستانی بھی وطن واپس آنے کیلئے انتظار میں بیٹھے ہیں۔

دوسری  طرف حکومت پاکستان کی جانب سے  اپنے شہریوں کو وطن واپس لانے کیلئے پی آئی اے کو ہدایات جاری کرنے پرغور کیا جارہا ہے ۔ ذرائع ایوی ایشن ڈویژن کے مطابق  پی  آئی  اے انتظامیہ  نے دوحہ اور دبئی سے پاکستان کے مختلف شہروں کیلئے پروازیں بڑھانے اور بڑے جہاز لگانے کا عندیہ دے دیا ہے ۔