دہشتگردی کیخلاف جنگ اور مسئلہ کشمیر کے حل کیلئے پاکستان کی مکمل حمایت کرتے ہیں، رجب طیب

اسلام آباد: ترکیہ کے صدر رجب طیب اردوان نے کہا ہے کہ پاکستان ہمارا دوسرا گھر ہے، دہشت گردی کے خلاف جنگ اور مسلہ کشمیر کے حل کے لیے ہمیشہ پاکستان کی حمایت کرتے ہیں۔ 
پاکستان اور ترکیہ کے درمیان مفاہمتی یادداشتوں پر دستخط کی تقریب سے خطاب کرتے ہوئے ترک صدر رجب طیب اردوان کا کہنا تھا کہ پاکستان نے دہشت گردی کے خلاف بڑی قربانیاں دی ہیں، دہشتگردی میں شہید ہونے والوں کے اہل خانہ سے تعزیت، دہشت گردی کے خلاف جنگ میں پاکستان کی مکمل حمایت کرتے ہیں۔
تقریب سے خطاب کرتے ہوئے ترک صدر طیب ایردوان نے کہا کہ پاکستان ہمارا دوسرا گھر ہے ، قائداعظم اور علامہ اقبال ہمارے بھی ہیروز ہیں ، ہم نے باہمی تعلقات مزید مضبوط بنانےپر اتفاق کیا ہے ، صدرآصف زرداری سے ملاقات میں تجارتی امور پر گفتگو ہوئی۔
ترک صدر نے کہا کہ دونوں ممالک میں 5 ارب ڈالر کے تجارتی حجم پر بات چیت ہوئی، تعلقات کو مزید مستحکم کرنے کیلئے کام کرتے رہیں گے۔
رجب طیب اردوان کا مزید کہنا تھا کہ مسئلہ کشمیر کے حل کیلئے پاکستان کی کوششوں کی حمایت کرتے ہیں، قبرص کے معاملے پر پاکستانی حمایت ہمارے لئے بہت اہمیت رکھتی ہے، دنیا کے ہر فورم پر پاکستان کے ہمراہ فلسطین کیلئے آواز بلند کی، آزاد فلسطینی ریاست کے قیام کیلئے ملکر کوششیں جاری رکھیں گے۔
وزیراعظم کا کہنا تھا کہ دونوں ممالک کے درمیان پائیدار شراکت داری کو مزید فروغ مل رہا ہے اور دونوں کے تعلقات نئی بلندیوں کو چھو رہے ہیں۔
اس موقع پر وزیراعظم شہباز شریف نے کہا کہ طیب ایردوان کو پاکستان آمد پر خوش آمدید کہتے ہیں ، پاکستان اور ترکیے کے درمیان برادرانہ تعلقات قائم ہیں ، امید ہے ترک صدر کا دورہ پاکستان بہت مفید ثابت ہو گا۔
انہوں نے کہا کہ ترکیہ ہر مشکل وقت میں پاکستان کے ساتھ کھڑا رہا ترک صدرنے سیلاب کے دوران پاکستانی عوام کے دل جیت لیے انہوں نے مشکل وقت میں پاکستان کے سیلاب زدہ علاقوں کا دورہ کیا اور اس دوران انہوں ںے فراخ دلی کے ساتھ پاکستان کی مدد کی۔
شہباز شریف نے کہا کہ غزہ پر ہمارا موقف بالکل واضح ہے، مسئلہ کشمیر پر ترکی نے ہمیشہ پاکستان کے موقف کی حمایت کی جب کہ پاکستان قبرص کے معاملے پر ہمیشہ ترکیہ کے موقف کی حمایت کرتا رہے گا۔
اپنے خطاب کے آخر میں وزیراعظم شہباز شریف نے ترک زبان میں طیب اردوان کا شکریہ ادا کیا۔