اڈیالہ جیل کے باہر فواد چوہدری اور شعیب شاہین کے درمیان جھگڑا ، فواد کے تھپڑ سے شعیب شاہین گر پڑے

راولپنڈی: اڈیالہ جیل کے باہرسنئیر سیاستدان رہنما فواد چوہدری اورپی ٹی آئی بیرسٹر شعیب شاہین کے درمیان تلخ کلامی کے بعد جھگڑا ہو گیا، جس کے دوران فواد چوہدری نے شعیب شاہین کو تھپڑ جڑ دیا جس سے وہ نیچے زمین پر گر پڑے۔
تفصیلات کے مطابق یہ واقعہ اڈیالہ جیل کے گیٹ نمبر پانچ پر پیش آیا، جہاں دونوں رہنماؤں کے درمیان پہلے سخت جملوں کا تبادلہ ہوا، جو بعد میں ہاتھا پائی میں تبدیل ہو گیا۔
 عینی شاہدین کے مطابق تھپڑ لگنے کے بعد شعیب شاہین زمین پر گر گئے اور ان کے بازو پر چوٹ آئی۔
فواد چودھری نے شعیب شاہین سے کہا تم ایجنسیوں کے ٹاوٹ ہو،جس پرشعیب شاہین نے فواد چودھری سے کہا اپنے کام سے کام رکھو۔
جھگڑے کے دوران دونوں رہنماؤں نے ایک دوسرے کو گالیاں بھی دیں، جس کے بعد موقع پر موجود جیل عملے نے فوری مداخلت کر کے دونوں کو ایک دوسرے سے الگ کیا۔
جھگڑے کے بعد فواد چوہدری اڈیالہ جیل کے اندر چلے گئے، جبکہ شعیب شاہین موقع پر ہی موجود رہے۔
خیال رہے کہ اس سے قبل بھی فواد چوہدری کا اینکر پرسن مبشر لقمان اور سمیع ابراہیم کے ساتھ جھگڑا ہو چکا ہے۔