لندن میں ہزاروں افراد کا ٹرمپ کے غزہ منصوبے کے خلاف احتجاج، پلان مضحکہ خیز قرار

ہزاروں افراد نے لندن کے مرکزی علاقے میں فلسطین کے حق میں مارچ کیا، جہاں انہوں نے سابق امریکی صدر ڈونلڈ ٹرمپ کے اس بیان کے خلاف احتجاج کیا جس میں انہوں نے امریکہ کو غزہ پر قبضہ کرنے کی تجویز دی تھی۔

ہفتے کو فلسطینی پرچم تھامے اور ”غزہ سے ہاتھ ہٹاؤ“ جیسے نعروں والے پلے کارڈز اٹھا رکھے مظاہرین نے مارچ کا آغاز ویسٹ منسٹر کے وائٹ ہال سے کیا اور اختتام امریکی سفارت خانے نائن ایلمز، جنوب مغربی لندن میں ہوا۔ مظاہرین نے بینرز بھی اٹھا رکھے تھے جن پر درج تھا، ’ٹرمپ کے خلاف کھڑے ہو‘ اور ’مسٹر ٹرمپ، کینیڈا آپ کی 51ویں ریاست نہیں، غزہ آپ کی 52ویں ریاست نہیں‘۔

ڈونلڈ ٹرمپ نے رواں ماہ غزہ کی تعمیر نو کے لیے ایک منصوبہ پیش کیا تھا، جس کے تحت فلسطینیوں کو دوسری جگہ آباد کرنے کی تجویز دی گئی تھی، تاہم اس میں ان کی واپسی کا کوئی منصوبہ شامل نہیں تھا۔ عالمی سطح پر اس تجویز کو شدید تنقید کا سامنا کرنا پڑا۔

غیر ملکی میڈیا کے مطابق، مظاہرین نے فلسطینی پرچم تھامے امریکی سفارت خانے کے باہر مظاہرہ کیا اور "قبضہ نہیں، آزادی!"، "غزہ برائے فروخت نہیں"، اور "نسلی صفائی نامنظور" جیسے نعرے لگائے۔

چند دن قبل، ڈونلڈ ٹرمپ نے ایک متنازع بیان میں کہا تھا کہ امریکا غزہ پر قبضہ کر لے گا اور وہاں کے شہریوں کو کسی اور جگہ منتقل کیا جائے گا، جس کے لیے اردن اور مصر سے مذاکرات جاری ہیں۔

یہ بیان سامنے آتے ہی نہ صرف فلسطینی بلکہ دنیا بھر میں انسانی حقوق کے کارکنوں اور عوام نے شدید احتجاج کیا۔ لندن میں ہونے والے اس احتجاجی مارچ کو فلسطینی عوام کے ساتھ یکجہتی کا ایک بڑا مظاہرہ قرار دیا جا رہا ہے۔

یہ احتجاج اس بات کا ثبوت ہے کہ ٹرمپ کے منصوبے کو عالمی سطح پر مسترد کیا جا رہا ہے۔ انسانی حقوق کی تنظیموں نے بھی ٹرمپ کے غزہ پر قبضے اور وہاں کی آبادی کو زبردستی ہٹانے کے منصوبے کو نسل کشی قرار دیتے ہوئے اس کی شدید مذمت کی ہے۔