افریقی ملک مالی میں سونے کی کان بیٹھنے سے 48 افراد ہلاک ، درجنوں لاپتہ

بماکو: مغربی افریقی ملک مالی میں سونے کی کان بیٹھ گئی جس کے نتیجے میں 48 افراد ہلاک اور متعدد لاپتہ ہو گئے۔
غیر ملکی خبر رساں ایجنسی کے مطابق کان سے غیر قانونی طور پر سونا نکالا جا رہا تھا، مرنے والے کان کنوں میں زیادہ تر خواتین شامل ہیں، کان میں دب جانے والوں کی تلاش شروع کر دی گئی ہے۔
مقامی پولیس ذرائع نے حادثے کی تصدیق کرتے ہوئے بتایا کہ بعض متاثرین پانی میں جا گرے، جن میں ایک خاتون بھی شامل تھی جس کی پیٹھ پر اس کا بچہ موجود تھا۔
واضح رہے کہ مالی کا شمار دنیا میں سب سے زیادہ سونا نکالنے والے ممالک میں ہوتا ہے لیکن یہاں سونے کی کانوں کے ارد گرد اکثر لینڈ سلائیڈنگ کے حادثات رونما ہوتے رہتے ہیں،اسی ماہ ہونے والے ایک حادثے میں 10 خواتین ہلاک ہو گئی جبکہ پچھلے سال اسی قسم کے حادثات میں 70 افراد ہلاک ہوئے تھے۔