ڈیلی ویجز ملازمین کی برطرفیاں،یوٹیلیٹی اسٹورز یونین کا 17 فروری کو ملک گیر احتجاج کا اعلان

اسلام آباد:ڈیلی ویجز ملازمین کی برطرفی کے خلاف یوٹیلیٹی اسٹورز یونین نے 17 فروری کو ملک گیر احتجاج کا اعلان کر دیا۔
یوٹیلیٹی اسٹورز یونین ذرائع کے مطابق اسلام آباد ہیڈ آفس بلو ایریا کے سامنے دن 2 بجے احتجاج ہوگا جبکہ ملک بھر کے پریس کلبز کے سامنے بھی مظاہرے کیے جائیں گے۔
وفاقی دارالحکومت میں دھرنے کا امکان ہے، مطالبات کی منظوری تک احتجاج جاری رہے گا۔
یونین عہدیداران کا کہنا ہے کہ برطرفی کا فیصلہ واپس نہ لیا گیا تو آئندہ کا لائحہ عمل دیا جائے گا۔ احتجاج شدت اختیار کر سکتا ہے اور ملک بھر میں اسٹورز بند کرنے کی وارننگ بھی دے دی گئی۔
سیکرٹری جنرل نیشنل ورکرز یونین راجہ مسکین نے کہا کہ ڈیلی ویجز کے بعداگلی باری ادارے کےکنٹرکٹ اورمستقل ملازمین کی ہوگی، انہوں نے کہا کہ برطرفیوں کےخلاف این آئی آر سی کے لیے کیس تیار کررہے ہیں،برطرفیوں کےخلاف حکم امتناع کے لیے کل رجوع کریں گے۔ جنرل سیکرٹری الائنس یونین عارف شاہ نے کہا کہ ایک ڈیلی ویجرجنید قریشی نےدلبرداشتہ ہوکرخودکشی کرلی،ہم اس کی ایف آئی آر حکومت اور انتظامیہ کےخلاف درج کرانے کی کوشش گے۔
واضح رہے کہ گزشتہ روز حکومت نے ملک بھر میں یوٹیلیٹی اسٹورز کارپوریشن (یو ایس سی) کے 2500 سے 2600 ڈیلی ویجز ملازمین کو نکالنے کا فیصلہ کیا تھا۔
ذرائع کے مطابق یو ایس سی بورڈ آف ڈائریکٹرز نے پہلے ہی ان ملازمین کو نکالنے کی منظوری دے دی تھی اور اب متعلقہ زونز کو اس پر عملدرآمد کے احکامات جاری کر دیے گئے ہیں۔