تحریک انصاف کے دور میں نفرت کا کلچر پروان چڑھا، شہباز شریف 

اسلام آباد: وزیر اعظم شہباز شریف کا کہنا ہے کہ پاکستان تحریک انصاف کے دور میں نفرت کا کلچر پروان چڑھا۔
اسلام آباد میں ایک تقریب سے خطاب کرتے ہوئےوزیر اعظم شہباز شریف نے کہا کہ ملکی معیشت کو ٹھیک کرنے کے لیے دن رات محنت کی ہے،اور ملکی معیشت کی بہتری کے لیے مزید محنت درکار ہے تاہم عوام کو بہتر معیشت کے ثمرات مل رہے ہیں۔
شہباز شریف نے کہا کہ ہم نے سفارشی کلچر کو ختم کرنے کی کوشش کی، ہم نے جب ملک کی باگ دوڑ سنبھالی تو حالات انتہائی مشکل تھے۔ اور سیاسی جھگڑوں سے نفرت پھیلتی ہے جو ملک کے لیے نقصان دہ ہے، انہوں نے مزید کہا کہ پی ٹی آئی کے دور میں نفرت کا کلچر پروان چڑھا۔ اور اسی نفرت کے کلچر نے ملک کو نقصان پہنچایا،باہمی اتفاق و اتحاد سے ہی ملک کو ترقی دی جا سکتی ہے۔
انہوں نے کہا کہ حکومت کی انتھک محنت اور معاشی پالیسوں کی وجہ سے مہنگائی کی شرح سنگل ڈیجٹ پر آ گئی ہے،اور آنے والے دنوں میں مہنگائی مزید کم ہو گی، مہنگائی کو کم کرنے میں پوری ٹیم کی کوششیں شامل ہیں۔
شہباز شریف کا کہنا تھا کہ سرکاری افسران کو بھی دن رات محنت کرنا ہوگی۔ ملک کی ترقی کے لیے ہر اسٹیک ہولڈر کو خلوص نیت سے کام کرنا ہو گا ۔ فوج ملکی سلامتی کے لیے جانوں کی قربانیاں دے رہی ہے۔