پی ٹی آئی وفد کی چیف جسٹس سے ملاقات کا اعلامیہ جاری

پی ٹی آئی کی قیادت نے چیف جسٹس یحییٰ آفریدی سے ان کی رہائش گاہ پر ملاقات کی، جس میں متعدد اہم موضوعات پر گفتگو کی گئی۔
چیف جسٹس نے پی ٹی آئی وفد کا خیرمقدم کیا اور نیشنل جوڈیشل پالیسی میکنگ کمیٹی کے مجوزہ اجلاس کے بارے میں آگاہ کیا۔

اعلامیہ کے مطابق چیف جسٹس نے بتایا کہ انہوں نے وزیراعظم سے ملاقات کی اور اصلاحات کے ایجنڈے پر حکومت کی رائے فراہم کرنے کی درخواست کی۔ وزیراعظم نے اس عمل کو مثبت انداز میں لیا اور پالیسی سازی اور اس پر عملدرآمد کے لیے مکمل تعاون کی یقین دہانی کرائی۔

چیف جسٹس یحییٰ آفریدی نے وزیراعظم کی جانب سے ٹیکس مقدمات کے التوا پر تشویش کا ذکر کرتے ہوئے یقین دہانی کرائی کہ ٹیکس مقدمات کو جلد نمٹایا جائے گا۔ انہوں نے کہا کہ سپریم کورٹ میں زیر التواء مقدمات کی تعداد میں کمی اولین ترجیح ہے۔

چیف جسٹس نے یہ بھی بتایا کہ قانون و انصاف کمیشن کو بار کونسلز اور ضلعی عدلیہ سے فیڈبیک موصول ہو چکا ہے، جبکہ ہائیکورٹس رجسٹرارز اور صوبائی جوڈیشل اکیڈمیز کی رائے بھی جلد متوقع ہے۔