سابق وزیر اعظم حسینہ واجدحکومت کا تختہ الٹنے والے طالبعلم رہنما نئی سیاسی جماعت بنانے کیلئے تیار

ڈھاکہ: سابق بنگلہ دیشی وزیر اعظم حسینہ واجد کی حکومت کا تختہ الٹنے والے طلبا لیڈر ناہید السلام نے نئی سیاسی جماعت بنانے کا فیصلہ کرلیا۔
غیر ملکی میڈیا کے مطابق حسینہ واجد حکومت کے خلاف احتجاجی تحریک کی قیادت کرنے والے’سٹوڈنٹس اگینسٹ ڈسکریمنیشن‘ (ایس اے ڈی) نامی طلبہ گروپ نےملک میںنئی سیاسی جماعت کے قیام کا فیصلہ کیا ہے،
 ایس اے ڈی گروپ نے ابتدا میں سرکاری ملازمتوں میں کوٹہ سسٹم کے خلاف ایک تحریک شروع کی تھی لیکن جلد ہی یہ ایک وسیع تر عوامی تحریک میں بدل گئی اور اسی ملک گیر خونی احتجاج کے نتیجے میں شیخ حسینہ کو اگست 2024 میں اقتدار چھوڑ کر انڈیا جانا پڑا۔
حسینہ واجد کے ملک سے فرار ہونے کے بعد بنگلہ دیش میں نوبل انعام یافتہ ماہر معاشیات ڈاکٹر محمد یونس کی قیادت میں عبوری حکومت کا قیام عمل میں لایا گیا تھا جوکہ اگست 2024 سے بنگلہ دیش کے عبوری حکمران ہیں۔

غیر ملکی میڈیا کے مطابق اس بات کا قوی امکان ہے کہ ناہید اسلام اپنی موجودہ سرکاری عہدے سے مستعفی ہو کر مکمل طور پر نئی جماعت کی قیادت پر توجہ دیں گے، تاہم انہوں نے اس حوالے سے تبصرہ کرنے سے گریز کیا۔
دوسری جانب ملک کے عبوری حکمران محمد یونس کا کہنا ہے کہ 2025  کے اختتام تک انتخابات ممکن ہیں اور کئی سیاسی تجزیہ کاروں کا ماننا ہے کہ نوجوانوں کی قیادت میں بننے والی یہ جماعت بنگلہ دیش کے سیاسی منظرنامے میں بڑی تبدیلی لا سکتی ہے۔
ڈاکٹر محمد یونس نے واضح کیا ہے کہ انہیں الیکشن میں حصہ لینے میں کوئی دلچسپی نہیں ہے، محمد یونس کے دفتر نے فوری طور پر نئی جماعت کے حوالے سے تبصرہ کرنے کی درخواست کا جواب نہیں دیا۔