وزیر اعظم دو روزہ سرکاری دورہ ازبکستان مکمل کرکے تاشقند سے اسلام آباد روانہ

اسلام آباد: وزیرِ اعظم محمد شہباز شریف اپنا دو روزہ سرکاری دورہ ازبکستان مکمل کرکے تاشقند سے اسلام آباد روانہ ہوگئے۔

ازبکستان کے وزیرِ اعظم عبداللہ عاریپوف، ازبک وزیرِ خارجہ بختیار سیدوف، تاشقند کے میئر شوکت عمرزاکوف، ازبکستان کے پاکستان میں سفیر علی شیر تختائیف اور پاکستان کے ازبکستان میں سفیر احمد فاروق سمیت اعلی سفارتی و سرکاری اہلکاروں نے وزیرِ اعظم کو تاشقند سے الوداع کیا۔

وزیرِ اعظم نے ازبکستان میں یادگار آزادی کا دورہ کیا اور پھولوں کی چادر چڑھائی۔ وزیرِ اعظم نے ازبکستان کی ترقی و خوشحالی کے لئے نیک خواہشات کا اظہار کیا اور صدر شوکت مرزیایوف کے ازبکستان کی ترقی کے ویژن کی تعریف کی۔

تاشقند ہوائی اڈے پر وزیرِ اعظم اور پاکستانی وفد کو الوداع کہنے کے لئے ازبک مسلح افواج کا چاک و چوبند دستہ بھی موجود تھا۔