جوڈیشل کمیشن نے آئینی بینچ میں مزید 5ججوں کا اضافہ کر دیا

اسلام آباد:جوڈیشل کمیشن نےسپریم کورٹ کے آئینی بینچ میں مزید 5 ججوںکا اضافہ کر دیا ہے۔
چیف جسٹس یحییٰ آفریدی کی زیر صدارت جوڈیشل کمیشن کے اجلاس میں سپریم کورٹ کے آئینی بینچ کی تعداد 8سے بڑھا کر 13 کرنے کی منظوری دی گئی۔
 آئینی بینچ میں مزید 5 نام شامل کرنے کی رائے آئینی بینچ کے سربراہ جسٹس امین الدین نے دی۔
ذرائع کے مطابق آئینی بنچ میں مزید 5 ججز کو شامل کرنے کی منظوری اکثریت سے دی گئی جبکہ جسٹس منیب اختر اور جسٹس منصور علی شاہ نے مخالفت کی۔
اس کے علاوہ پی ٹی آئی کے دو ممبران بیرسٹر علی ظفر اور بیرسٹر گوہر نے بھی مخالفت کی اور رائے دی کہ سپریم کورٹ کے تمام ججز کو آئینی بینچ میں شامل کیا جائے۔
جسٹس ہاشم کاکڑ، جسٹس عامر فاروق اور جسٹس اشتیاق ابراہیم آئینی بینچ کا حصہ ہونگے،جسٹس صلاح الدین پنہور اور جسٹس شکیل احمد بھی آئینی بینچ کے رکن نامزد کئے گئے ہیں، جس کے بعد سپریم کورٹ کے آئینی بینچ میں کل ججز کی تعداد 13 ہوگئی۔
علاوہ ازیں چیف جسٹس کی زیر صدارت جوڈیشل کمیشن کے اجلاس میں لاہور ہائیکورٹ کے 4 ایڈیشنل ججز کی بھی منظوری دی گئی۔
سیشن جج راجہ غضنفرعلی خان،طارق محمود باجوہ،عبہر گل خان اور تنویر احمد شیخ کے ناموں کی بطور ایڈیشنل جج لاہور ہائیکورٹ منظوری دی گئی۔