گجرات :گاڑی پر مسلح افراد کی فائرنگ سے 6 افراد جاں بحق

گجرات :صوبہ پنجاب کے ضلع گجرات میں گاڑی پر مسلح افراد کی فائرنگ سے 6 افراد جاں بحق ہوگئے۔
تفصیلات کے مطابق فائرنگ کاافسوسناک واقعہ گجرات کے نواحی علاقے ڈنگہ میں پیش آیا ہے جہاں گاڑی پر مسلح افراد نے فائرنگ کردی، جس کے نتیجے مں 6 افراد جان کی بازی ہار گئے۔
فائرنگ کے نتیجے میں جاں بحق ہونے والوں کا تعلق ایک ہی گاؤں سے تھا۔
پولیس کے مطابق جاں بحق ہونے والوں کی عمریں 25 سے 35 سال کے درمیان ہیں۔ جن کی شناخت زاہد ناظم، مبشر، زنیر، جاوید اقبال، رخسار اور ایک نامعلوم سے ہوئی ہے، جن کی لاشوں کو قریبی اسپتال منتقل کر دیا گیا ہے،
پولیس حکام کا کہنا ہے کہ فائرنگ کا واقعہ پرانی دشمنی کا شاخسانہ ہے۔
دوسری جانب آئی جی پنجاب عثمان انور نے واقعے کا نوٹس لیتے ہوئے آر پی او گوجرانوالہ سے رپورٹ طلب کرلی۔
آئی جی پنجاب نے ڈی پی او گجرات کو ملزمان کی فوری گرفتاری کا حکم دیتے ہوئے کہا کہ ملزمان کی گرفتاری کے لیے تمام وسائل بروئے کار لائیں۔