ایرانی نائب صدر جواد ظریف عہدے سےمستعفی 

تہران:ایران کے نائب صدر برائے اسٹریٹجک امور جواد ظریف مستعفی ہوگئے ہیں۔
بین الاقوامی خبر رساں ادارے کی رپورٹ کے مطابق مختلف ذرائع سے ایران کے نائب صدر جواد ظریف کے مستعفی ہونے کی تصدیق ہوچکی ہے۔
غیر ملکی میڈیا کے مطابق ایرانی نائب صدر نے یہ استعفیٰ وزیرِ اقتصادی امور عبدالنا صر ہمتی سے پوچھ گچھ اور ان کی سبکدوشی کے بعد دیا ہے۔
 ایرانی حزبِ اختلاف کی جانب سے کئی دنوں سے ان کے 2 بیٹوں کے امریکی شہریت کے حامل ہونے پر ان کی بطور نائب صدر تقرری کو غیر قانونی قرار دیا جا رہا تھا۔
خیال رہے کہ گزشتہ روز مہنگائی کنٹرول کرنے میں ناکامی اور کرنسی کی قدر گھٹنے پر ایرانی وزیر خزانہ کو بھی عہدے سے ہٹا دیا گیا تھا۔
واضح رہے کہ محمد جواد ظریف اس سے قبل حسن روحانی کی حکومت (2013 سے 2021) میں بطور وزیر خارجہ فرائض انجام دے چکے ہیں۔ وہ ان مذاکرات کی اہم ترین شخصیات میں سے ہیں جن کے نتیجے 14 جولائی 2015 کو ایران اور بڑی طاقتوں کے درمیان جوہری معاہدے پر دستخط ہوئے۔
جواد ظریف ایران کی جانب سے اس معاہدے کے منصوبہ ساز قرار دیے جاتے ہیں،سال 2024 میں ہونے والے آخری صدارتی انتخابات میں ظریف ، مسعود پزشکیان کے حمایتی رہے۔ انھوں نے موجودہ صدر کے لیے اصلاح پسندوں اور اعتدال پسندوں کی تائید حاصل کرنے میں اہم کردار ادا کیا تھا۔