خواتین کے عالمی دن کے موقع پر سینیٹ میں قرارداد منظور

سینیٹ نے آج ( ہفتہ ) کومتفقہ طور پر ایک قرارداد منظور کی جس میں حکومت کو خواتین کی کاروباری سرگرمیوں میں شمولیت یقینی بنانے اور ان میں اضافہ کرنے کے لیے اقدامات کرنے کی سفارش کی گئی۔

سینیٹر شیری رحمان کی طرف سے آج (ہفتہ) خواتین کے عالمی دن کے موقع پر پیش کی گئی قرارداد میں مطالبہ کیا گیا ہے کہ ایسے انفراسٹرکچر کو ڈیزائن اور تعمیر کیا جائے جو خواتین کی ضروریات کو پورا کر کے ٹرانسپورٹ سیفٹی، کام کی جگہ پر بچوں کی دیکھ بھال اور ڈیجیٹل اور مالی وسائل تک رسائی کو بہتر بنا کر ان کی معاشی شراکت میں مدد کرے۔

قرار داد میں مطالبہ کیا گیا کہ خواتین کو معیاری تعلیم و تربیت فراہم کی جائے اور سکول کی تعلیم میں حائل رکاوٹوں کو ختم کیا جائے اور خواندگی کے پروگرام کو فروغ دیا جائے۔

قرارداد میں کہا گیا کہ اس بات کو یقینی بنایا جانا چاہیے کہ خواتین کو صحت مندانہ انتخاب کرنے کا حق حاصل ہے اور وہ کم عمری میں شادی کے لیے مجبور نہ ہوں۔ اس نے اس بات پر زور دیا کہ خواتین کو صحت کی دیکھ بھال کی پالیسیوں میں اصلاحات، تولیدی صحت کی خدمات تک رسائی کو یقینی بنانے اور ذہنی اور زچگی کی صحت کی دیکھ بھال کو ترجیح دے کر ان کی صحت کے بارے میں باخبر فیصلے کرنے میں مدد کی جانی چاہیے۔

قرارداد میں کہا گیا کہ خواتین کو تکنیکی تربیت سے آراستہ کرکے پائیدار زراعت اور غذائی تحفظ میں شامل ہونا چاہیے اور زمینی حقوق اور زراعت کی مالی اعانت تک رسائی کو یقینی بنانا چاہیے تاکہ موسمیاتی لچک اور خوراک کی پائیداری میں ان کے کردار کو بڑھایا جا سکے۔

قرارداد میں خواتین کی قانونی حقوق تک رسائی کو یقینی بنانے اور کام کی جگہ پر صنفی بنیاد پر تشدد اور جنسی طور پر ہراساں کیے جانے کے خلاف کارروائی کا مطالبہ کیا گیا ، اس نے خواتین کھلاڑیوں میں سرمایہ کاری بڑھا کر کھیلوں میں خواتین کی شرکت کو بڑھانے کا مطالبہ کیا۔

ہائوس نے حکومت، سول سوسائٹی کی تنظیموں اور نجی شعبے سمیت تمام اسٹیک ہولڈرز سے صنفی مساوات اور خواتین کو بااختیار بنانے کے اجتماعی حصول میں ہاتھ بٹانے کا مطالبہ کیا۔

قبل ازیں اجلاس کے آغاز پر نومنتخب سینیٹر اسد قاسم نے اپنے عہدے کا حلف اٹھایا ، چیئرمین سینیٹ سید یوسف رضا گیلانی نے ان سے حلف لیا۔

ایوان کی کارروائی منگل کو دوبارہ ساڑھے گیارہ بجے کے لیے ملتوی کر دی گئی ہے۔