ایف آئی اے کی کارروائی،انسانی اسمگلنگ میں ملوث دو ملزمان گرفتار

گوجرانوالہ:وفاقی تحقیقاتی ادارے (ایف آئی اے)نے کارروائی کرتے ہوئےانسانی اسمگلنگ میں ملوث دو ملزمان کو گرفتار کر لیا۔
ترجمان ایف آئی اے کے مطابق گرفتار ملزمان سمندر کے راستے شہریوں کو غیر قانونی طور پر یورپ بھجوانے میں ملوث تھے۔
ترجمان کا کہنا ہے کہ گرفتار ملزمان کی شناخت شبیر احمد اور محمد جاوید کے نام سے ہوئی، ملزمان کو گجرات اور نارووال کے علاقوں سے گرفتار کیا گیا، ملزم شبیر احمد نے شہریوں سمندر کے راستے اسپین بھجوانے کے لیے 13 لاکھ روپے سے زائد وصول کیے۔
 ترجمان کا مزید کہنا تھا کہ ملزم شبیر نے شہریوں کو کشتی کے ذریعے غیر قانونی طور پر موریطانیہ سے اسپین اسمگل کرنے کی کوشش کی لیکن شہریوں نے کشتی کے ذریعے سفر سے انکار کر دیا اور واپس پاکستان آگئے۔
جبکہ گرفتار ملزم محمد جاوید گزشتہ 14 سال سے اشتہاری ہے، ملزم کے خلاف سال 2011 میں مقدمہ درج ہوا تھا۔
ملزم نے شہری کو مسقط بھجوانے کے عوض 2 لاکھ 75 ہزار روپے وصول کیے تھے لیکن شہری کو بیرون ملک بھجوانے میں ناکام رہا اور روپوش ہوگیا۔
ترجمان ایف آئی اے کے مطابق ملزمان کو گرفتار کر کے تفتیش کا آغاز کر دیا گیا ہے۔