وزیر مواصلات کی این ایچ اے ممبران کو کارکردگی بہتر بنانے کیلئے 2 مہینے کی ڈیڈ لائن

وفاقی وزیر مواصلات عبدالعلیم خان نے این ایچ اے ممبران کو کارکردگی بہتر بنانے کیلئے 2 مہینے کی ڈیڈ لائن دیدی ۔

وفاقی وزیر مواصلات عبدالعلیم خان کی زیر صدارت این ایچ اے ممبران کا اجلاس ہوا جس دوران  عبدالعلیم خان نے اظہار برہمی کرتے ہوئے کہا کہ نیشنل ہائی وے اتھارٹی اپنی روش بدلے۔

عبدالعلیم خان نے وارننگ دیتے ہوئے کہا کہ جو افسر کام نہیں کرے گا اسے گھر جانا ہو گا،  سست روی نہیں چلے گی، تمام ممبران منصوبوں میں شفافیت یقینی بنائیں،شاہراہوں کی بروقت تکمیل اولین ترجیح ہے  تاخیر سے لاگت میں اضافہ ہوا ہے ، 2 ماہ بعد کارکردگی بہتر نہ بنانے والوں  کو فارغ کر دیا جائے گا۔انہوں نے کہا کہ  جن منصوبوں پر زیادہ کام ہوچکا،پہلے وہ مکمل کیے جائیں۔

وفاقی وزیر مواصلات نے این ایچ اے افسران کو محنت، لگن اور تندہی سے کام کرنے کی ہدایت کی۔  اجلاس میں سندھ،بلوچستان اور خیبرپختونخوا کے  شاہراہوں  کے منصوبوں پر بریفنگ دی گئی ۔وفاقی سیکرٹری مواصلات، چیئرمین این ایچ اے اور سینئر افسران نے اجلاس میں رپورٹ پیش کی۔