وزیر اعظم شہبازشریف وفد کے ہمراہ سعودی عرب پہنچ گئے

جدہ: وزیر اعظم شہباز شریف وفد کے ہمراہ4 روزہ دورے پر سعودی عرب کے شہر جدہ پہنچ گئے۔
وفد میں نائب وزیراعظم و وزیر خارجہ سینیٹر اسحاق ڈار، وزیر اعلیٰ پنجاب مریم نواز سمیت اہم وفاقی وزرا اور اعلیٰ حکام شامل ہیں۔
جدہ ایئرپورٹ پرگورنر جدہ شہزادہ سعود بن عبداللہ بن جلاوی اور پاکستانی سفیر احمد فاروق نے وزیراعظم کا شاندار استقبال کیا۔
وزیراعظم 19 سے 22 مارچ تک سعودی عرب میں اہم ملاقاتیں کریں گے۔
وزیراعظم کا دورہ پاکستان اور سعودی عرب کے مابین گہرے تاریخی تعلقات کو اجاگر کرتا ہے اور دونوں ممالک کے مابین باہمی افہام و تفہیم میں اضافے، تجارت، سرمایہ کاری میں تعاون بڑھانے اور دوطرفہ، علاقائی اور عالمی معاملات پر سفارتی روابط کے مزید فروغ کی راہ ہموار کرے گا۔
وزیراعظم سعودی ولی عہد اور وزیر اعظم محمد بن سلمان سے ملاقات کریں گے، دونوں رہنما تجارت، اہم شعبوں میں شراکت داری اور وسیع تر اقتصادی تعاون پر بات چیت کریں گے۔
ملاقاتوں کے دوران غزہ کی صورت حال، مشرق وسطیٰ کی تبدیلیوں اور امت مسلمہ کے مسائل پر بھی تبادلہ خیال کیا جائے گا۔