ہیتھرو ائیرپورٹ کو بجلی دینے والےسب اسٹیشن میں آتشزدگی، فلائٹ آپریشن معطل

برطانیہ کا مصروف ترین ہیتھرو ائیرپورٹ بجلی کی فراہمی میں خلل کے باعث آج پورا دن ہر قسم کی آمدورفت کے لیے بند رہے گا۔

برطانوی میڈیا رپورٹس کے مطابق لندن کے ہیتھرو ائیرپورٹ کو بجلی دینے والےسب اسٹیشن میں آگ لگ گئی جس کے باعث ائیرپورٹ کو بجلی کی فراہمی میں شدید خلل پڑا ہے۔

ترجمان ہیتھرو ائیرپورٹ کا کہنا ہے کہ ائیرپورٹ آج 21 مارچ کو رات تک بند رہے گا، مسافر ائیرپورٹ نہ آئیں، ائیرلائنز سے رابطہ کریں۔

میڈیا رپورٹس کے مطابق ہیتھرو ائیرپورٹ پر روزانہ تقریبا 1300 پروازیں آتی اور جاتی ہیں، ائیرپورٹ کی تمام دن بندش سے لاکھوں مسافروں کو پریشانی کا سامنا ہوگا۔

برطانوی میڈیا کا بتانا ہے کہ مغربی لندن میں سب اسٹیشن میں آگ لگنے سےہزاروں گھر بھی بجلی سے محروم ہو گئے ہیں، سب اسٹیشن کے قریب واقع 150 گھروں کو بھی خالی کرالیا گیا ہے اور دھویں کے سبب قریبی آبادی کو گھروں کی کھڑکیاں بند رکھنے کا مشورہ دیا گیا ہے۔

سب اسٹیشن پر لگی آگ پر قابو پانے کیلئے 10 فائر انجن اور70 فائر فائٹر مصروف ہیں۔