کلبھوشن کے بعد بھارتی دہشتگردی کا دوسرا بڑا نیٹ ورک بے نقاب کردیا ، فواد چوہدری

وفاقی وزیر اطلاعات فواد چوہدری نے وفاقی کابینہ اجلاس کے بعد پریس کانفرنس کرتے ہوئے کہا ہے کہ  وفاقی وزراء اور وزیر مملکت کے پروٹوکول کا جائزہ لیا گیا، وزیراعظم کو شکایت ملی ہے کہ وزراء زائد پروٹوکول استعمال کررہے ہیں، وزیراعظم نے ہدایت کی ہے کہ پروٹوکول میں کمی لائی جائے، تحریک انصاف حکومت پروٹوکول کلچر کے خلاف ہے، وزیر اعظم نے فلیگ ایکٹ پر عملدرآمد کا حکم دیا ہے۔ انہوں نے کہا کہ   امتحانات میں شفافیت لانے کے لئے کمیٹی بنائی گئی ہے، حکومت کی کوشش ہے طلبہ کے امتحانات شفاف ہوں۔

فواد چوہدری کا کہنا تھا کہ کابینہ اجلاس میں لاہور دھماکے کی تحقیقات کرنے والی ٹیم کو سراہا گیا ہے،  تحقیقاتی  ٹیم نے کلبھوشن کے بعد  بھارت کی دہشتگردی کا دوسرا بڑا  نیٹ ورک پکڑا ہے، بلوچستان میں دہشت گردوں کانیٹ ورک  کامیابی سے توڑ دیا ہےاس کی تفصیلات جلد  منظر عام پر لائیں گے، امید ہے جلد بلوچستان میں امن آئے گا ، وزیراعظم نے ناراض بلوچوں سے مذاکرات کا کہا ہے، وہ لوگ جو بھارت سے رابطے میں نہیں تھے ان سے بات کی جائے گی  اور اس حوالے سے   ناراض بلوچ عسکریت پسندوں سے بات چیت شروع کردی  گئی ہے۔

وزیر اطلاعات کا کہنا تھا کہ  وزیراعظم  عمران خان نے  قومی اسمبلی اجلاس میں  اپوزیشن کو انتخابی اصلاحات کی دعوت دی، شفاف الیکشن کے لئے نظام بنانا چاہیے۔ جب تک سیاسی جماعتیں مضبوط نہیں تو الیکٹیبلز کا کردار رہے گا۔انہوں نے کہا کہ  اب کشمیر الیکشن میں دھاندلی کا الزام لگایا جارہا ہے، پیپلز پارٹی کے پاس صرف 8 امیدوار جبکہ ن لیگ کے پاس 12 ہیں، جب امیدوار ہی نہیں ہیں تو ابھی سے دھاندلی کا رونا شروع کردیا ہے۔