بھارت:متنازع وقف ترمیمی بل کے خلاف مسلمانوں کا مختلف شہروں میں احتجاج

نئی دہلی: بھارت میں انتہا پسند مودی سرکار کی جانب سے پارلیمنٹ سے منظور ہونے والے منتازع وقف ترمیمی بل کے خلاف ہندوستان کے مختلف شہروں میں مسلمانوں کا احتجاج جاری ہے۔
بھارتی میڈیا کے مطابق لوک سبھا کے بعد راجیہ سبھا نے بھی وقف ترمیمی بل جمعرات کے روز دیر گئےرات کو پاس کر دیا، دونوں ایوانوں کی منظوری کے بعد اب یہ بل بھارتی صدر کے پاس جائے گا اور ان کی منظوری کے بعد یہ باقاعدہ قانون کی شکل اختیار کرلے گا ۔
دوسری جانب اس متنازع بل کے خلاف جمعہ کو بھارت کے مختلف شہروں میں بڑی تعداد میں مسلمانوں نے اس کی مخالفت میں احتجاج کیا ۔ بھارتی میڈیا رپورٹس کے مطابق وقف ترمیمی بل کے خلاف جمعہ کی نماز کے بعد مسلم کمیونٹی کے لوگ بڑی تعداد میں کولکتہ کی سڑکوں پر نکلے اور اس کی مخالفت کی۔

 اس دوران لوگوں نے حکومت کے خلاف شدید احتجاج کیا، ان کے ہاتھوں میں پوسٹر تھے جن پر لکھا تھا ہم وقف بل کو مسترد کرتے ہیں،پولیس کی بھاری نفری کے درمیان لوگوں نے سڑکوں پر نکل کر نعرے لگائے۔
اسی طرح دہلی کی جامعہ ملیہ اسلامیہ یونیورسٹی کے طلبہ نے بھی وقف بل کے خلاف احتجاج کیا۔ یہ احتجاج طلبہ تنظیموں AISA اور NSUI سے وابستہ طلبہ نے کیا۔
 وقف ترمیمی بل کے خلاف کالج کیمپس کے اندر احتجاج ہوا، جس کے بعد کیمپس کے باہر پولیس اور آر اے ایف کو کسی بھی غیر معمولی صورتحال سے نمٹنے کیلئے تعینات کر دیا گیا تھا۔

دوسری جانب لوک سبھا میں اپوزیشن لیڈر راہول گاندھی نے کہا کہ وقف ترمیمی بل کا مقصد مسلمانوں کو پسماندہ کرنا اور ان کے جائیداد کے حقوق کو غصب کرنا ہے۔

انہوں نے کہا کہ بی جے پی اور اتحادیوں کا آئین پر یہ حملہ مسلمانوں پر حملہ ہے، بل مستقبل میں دوسری برادریوں کو نشانہ بنانے کی بھی مثال بنے گا۔

اس حوالے سے ردعمل دیتےہوئے ریاست تامل ناڈوکے وزیراعلیٰ اورڈی ایم کے رہنما ایم کےاسٹالن نے بل کی شدید مذمت کی اور وقف ترمیمی بل سپریم کورٹ میں چیلنج کرنےکااعلان بھی کیا۔

وزیراعلیٰ تامل ناڈو ایم کے اسٹالن نے کہا کہ ڈی ایم کے وقف ترمیمی بل کے خلاف سپریم کورٹ میں جائےگی، ترمیمی بل وقف بورڈ کی خود مختاری کے خلاف ہے، اس سے اقلیتی مسلم آبادی کو خطرہ لاحق ہے۔