میلہ چراغاں کے سالانہ عرس کے موقع پر 12 اپریل بروز ہفتہ کو لاہور میں عام تعطیل کا اعلان

 حکومت پنجاب نے صوفی شاعر حضرت شاہ حسینؒ المعروف میلہ چراغاں کے سالانہ عرس کے موقع پر 12 اپریل بروز ہفتہ کو لاہور میں عام تعطیل کا اعلان کر دیا ہے۔

نوٹیفکیشن میں واضح کیا گیا کہ یہ تعطیل صرف لاہور ضلع میں لاگو ہو گی اور تمام ذیلی دفاتر بھی اس میں شامل ہوں گے، تاہم پنجاب سول سیکرٹریٹ، اس سے منسلک محکمے اور علاقائی دفاتر تعطیل سے مستثنیٰ ہوں گے۔

سروسز اینڈ جنرل ایڈمنسٹریشن ڈیپارٹمنٹ (S&GAD) کی جانب سے جاری کردہ نوٹیفکیشن کے مطابق لاہور ضلع کی تمام سرکاری دفاتر اور ادارے اس روز بند رہیں گے تاکہ شہری روایتی تقریبات میں آسانی سے شرکت کر سکیں۔

یہ میلہ کئی دنوں تک جاری رہتا ہے، جس میں صوفیانہ موسیقی، شاعری، اور روایتی رسومات پیش کی جاتی ہیں، جو لاہور کی روحانی اور ثقافتی ورثے کی نمائندگی کرتی ہیں۔

میلہ چراغاں  جسے "روشنیوں کا میلہ" بھی کہا جاتا ہے حضرت شاہ حسینؒ کے عرس کے سلسلے میں منایا جاتا ہے، جو 16ویں صدی کے معروف پنجابی صوفی شاعر تھے۔ یہ تقریب لاہور کے تاریخی شالامار باغ کے قریب ان کے مزار پر منعقد ہوتی ہے جہاں ہزاروں زائرین شرکت کرتے ہیں۔